पत्नी नांदायला येत नव्हती, संतापलेल्या पतीने विष पाजून केला हत्येचा प्रयत्न
अंजली पांडे हिचे काही कारणावरुन पतीशी वाद असल्याने ती पतीचे घर सोडून माहेरी राहत होती. पती वारंवार घरी येण्यास सांगत होता. मात्र ती पतीच्या घरी नांदायला जायला तयार नव्हती.
डोंबिवली : पत्नी नांदायला यायला तयार नव्हती म्हणून संतापलेल्या पतीने ज्यूसमधून पत्नीला विषारी औषध पाजून जीवे मारण्याचा प्रयत्न केला. डोंबिवली पश्चिमेला ही धक्कादायक घटना घडली आहे. पत्नीचा आरडाओरडा ऐकून ऑफिसमधील लोक बाहेर आले आणि त्यांनी आरोपीला पकडून पोलिसांच्या ताब्यात दिले. विष्णुनगर पोलीस ठाण्यात आरोपींविरोधात गुन्हा दाखल करण्यात आला आहे. कृष्णकांत पांडे असे अटक करण्यात आलेल्या आरोपीचे नाव आहे.
पत्नी नांदायला जायला तयार नव्हती
अंजली पांडे हिचे काही कारणावरुन पतीशी वाद असल्याने ती पतीचे घर सोडून माहेरी राहत होती. पती वारंवार घरी येण्यास सांगत होता. मात्र ती पतीच्या घरी नांदायला जायला तयार नव्हती.
पतीने पत्नीशी भांडण करत विषारी औषध घालून ज्यूस पाजला
यात रागातून कृष्णकांत पत्नी काम करत असलेल्या डोंबिवली पश्चिमेकडील दीनदयाळ रोड परिसरातील कार्यालयात गेला. तेथे जाऊन त्याने पत्नीला ऑफिसबाहेर बोलावून घेतले. कृष्णकांतने पत्नीला नांदायला का येत नाही विचारत तिच्याशी भांडण करायला सुरवात केली.
भांडणानंतर त्याने तुला मारुन टाकतो म्हणत आपल्या जवळील पिशवीतून विषारी औषध मिश्रित ज्यूस काढला आणि तो बळजबरीने अंजलीला प्यायला भाग पाडले.
पत्नीच्या सहकाऱ्यांनी आरोपी पतीला पकडून पोलिसात दिले
पत्नीला ज्यूस पाजल्यानंतर कृष्णकांत तेथून पळून गेला. मात्र पत्नीचा आरडाओरडा ऐकून ऑफिसमधील लोक बाहेर आले. सर्व सहकाऱ्यांनी कृष्णकांतचा पाठलाग करत त्याला पकडले आणि विष्णुनगर पोलिसांच्या ताब्यात दिले.
विष्णुनगर पोलिसांनी कृष्णकांत विरोधात गुन्हा दाखल करत त्याला अटक केली आहे. विषारी औषध पोटात गेल्याने अंजलीला उपचारासाठी कळवा रुग्णालयात दाखल केले आहे.
