ज्येष्ठ विचारवंत डॉ. कलबुर्गींच्या मारेकऱ्यांची ओळख पटली

ज्येष्ठ विचारवंत डॉ. कलबुर्गींच्या मारेकऱ्यांची ओळख पटली

बेळगाव : ज्येष्ठ विचारवंत डॉ. एम. एम. कलबुर्गीं यांच्या मारेकऱ्याची ओळख पटली आहे. डॉ. कलबुर्गींच्या पत्नी उमादेवी आणि अन्य एका साक्षीदाराने दोन्ही आरोपींना ओळखले. कर्नाटकमधील कल्याणनगर (धारवाड) येथे 30 ऑगस्ट 2015 रोजी त्यांच्यावर गोळ्या झाडून हत्या करण्यात आली होती. कलबुर्गी यांच्यावर गणेश मिस्किने गोळ्या झाडल्या होत्या, तर प्रवीण प्रकाश चतुर हा दुचाकी चालवत असल्याचे एसआयटीच्या तपासात पुढे आले आहे.

संबंधित आरोपी धारवाड येथील मध्यवर्ती कारागृहात आहेत. त्यांची तहसीलदार प्रकाश कुदरी यांच्या उपस्थितीत ओळखपरेड घेण्यात आली. यावेळी कलबुर्गी यांच्या पत्नीने आरोपींना ओळखले. गौरी लंकेश यांच्या हत्येतील संशयितांचा कलबुर्गी हत्या प्रकरणातही सहभाग असल्याचा संशय होता. या संशयावरून त्यांची चौकशी केली असता काही महत्त्वाचे धागेदोरे हाती लागले आहेत.

मेकॅनिक असलेल्या वासुदेव सूर्यवंशीने संबंधित दुचाकी चोरल्याचे स्पष्ट झाले आहे. गौरी लंकेश यांच्या हत्येसाठी वापरण्यात आलेल्या दुचाकीची दवणगेरेतून तर कलबुर्गी यांच्या हत्येसाठी हुबळीतून दुचाकी चोरण्यात आली होती. हुबळी येथील सबअर्बन पोलीस ठाण्यात दुचाकी चोरीच्या घटनेची नोंदही आहे.

दरम्यान, मागील काही काळात कलबुर्गी यांच्यासह ज्येष्ठ विचारवंत डॉ. नरेंद्र दाभोळकर, कॉम्रेड गोविंद पानसरे, पत्रकार गौरी लंकेश यांच्या हत्येने मोठी खळबळ माजली होती. न्यायालयाने देखील यावर चिंता व्यक्त केली होती. विशेष म्हणजे या सर्व हत्येंमध्ये काही जवळचा संबंध असल्याचा संशय आधीपासून व्यक्त केला जात होता. आता नव्याने आलेल्या माहितीनुसार गौरी लंकेश आणि कलबुर्गी यांच्या हत्येसाठी वापरलेल्या दोन्ही दुचाकी चोरीच्या होत्या. आरोपी प्रवीण प्रकाश चतुर आणि गणेश मिस्किनने या दुचाकींचा वापर केला होता.

कमेंट करा

कमेंट करा

Your email address will not be published. Required fields are marked *