‘पीएम नरेंद्र मोदी’ सिनेमाबाबत कोर्टाचा मोठा निर्णय

नवी दिल्ली : पंतप्रधान नरेंद्र मोदी यांच्या जीवनावर आधारित ‘पीएम नरेंद्र मोदी’ या सिनेमाचं प्रदर्शन थांबवण्यात यावं, अशी याचिका दिल्ली उच्च न्यायालयाकडे करण्यात आली होती. मात्र, न्यायालयाने ही याचिका फेटाळली. मुख्य न्यायाधीश राजेंद्र मेनन आणि न्यायमूर्ती अनूप जयराम भामभानी यांच्या खंडपिठाने वकिल सुजीत कुमार सिंग यांची ही याचिका फेटाळून लावली. या याचिकेत वकिल सुजीत कुमार सिंग यांनी आचार संहिता लागू झाल्याने या सिनेमाचे प्रदर्शन थांबवण्यात यावे अशी मागणी केली होती.

या सिनेमाचा ट्रेलर आणि गाणी प्रदर्शित होताच हीट झाली. मोदींचा पंतप्रधान पदापर्यंतचा प्रवास कसा होता, हे जाणून घेण्याची सर्वांनाच उत्सुकता आहे. मोदींच्या याच प्रवासाची एक झलक ‘पीएम नरेंद्र मोदी’ या सिनेमाच्या ट्रेलरमध्ये पाहायला मिळत आहे. त्यामुळे प्रेक्षक मोठ्या उत्सुकतेने या सिनेमाची वाट पाहत आहेत. हा सिनेमा येत्या 5 एप्रिलला प्रदर्शित होणार आहे. मात्र, याच्या प्रदर्शनाची तारीख बदलू शकते. जर असं झालं, तर ऐन लोकसभा निवडणुकांवेळी हा सिनेमा प्रदर्शित करण्यात येईल.

‘पीएम नरेंद्र मोदी’ सिनेमाच्या अडीच मिनिटांच्या ट्रेलरमध्ये मोदींच्या जीवनातील वेगवेगळे टप्पे आणि महत्त्वाच्या घटना दाखवण्यात आल्या आहेत. एक चहाविक्रेत्या ते भारत देशाच्या पंतप्रधानपदापर्यंतचा मोदींचा प्रवास यात दाखवण्यात आला आहे. या ट्रेलरमध्ये मोदींच्या पंतप्रधान पदापर्यंच्या प्रवासात येणाऱ्या अडचणी आणि पंतप्रधान झाल्यावर उद्भवलेले वाद, त्यातून मार्ग काढत पुढे जाणारे मोदी दाखवण्यात आले आहे.

अभिनेता विवेक ओबेरॉयची प्रमुख भूमिका असलेल्या या सिनेमाचे दिग्दर्शन ओमंग कुमार यांनी केलं आहे. विवेक ओबेरॉयने अत्यंत उत्कृष्ट मोदी साकारले आहेत. तो मोदींच्या लूकला पूर्णपणे न्याय देण्यात यशस्वी ठरला आहे. विवेक ओबेरॉयसोबतच या सिनेमात बोमन इराणी, इरीना बहाव, बरखा बिष्ट, मनोज जोशी, प्रशांत नारायणन यांसारखे कलाकार दिसणार आहेत. बोमन इराणी यात रतन टाटा यांच्या भूमिकेत असणार आहेत,  तर मनोज जोशी हे अमित शाह यांची भूमिका साकारत आहेत. हा सिनेमा हिंदी, तामिळ आणि तेलुगू या भाषांमध्ये प्रदर्शित होणार आहे.

पाहा व्हिडीओ :