हिंगणघाट जळीतकांड : आरोपी विकी नगराळेला 14 दिवसांची न्यायालयीन कोठडी

वर्धा : हिंगणघाट जळीतकांड प्रकरणातील आरोपी विकेश ऊर्फ विकी नगराळेची न्यायालयीन कोठडीत रवानगी करण्यात आली आहे. न्यायाधीश रत्नमाला डफरे यांच्या समक्ष सकाळी 6 वाजताच्या सुमारास आरोपीला उपस्थित करण्यात आले होते (Wardha Hinganghat Teacher Burnt Case). सुरक्षेच्या दृष्टीने पोलिसांनी गुप्तता पाळत आरोपीला न्यायालयात हजर केले. न्यायालयाने आरोपीला 14 दिवसांची न्यायालयीन कोठडी सुनावत त्याची वर्धा कारागृहात रवानगी केली आहे. या प्रकरणात पोलिसांनी पुढे तापासाठी गरज भासल्यास पोलीस कोठडीचा अधिकार राखून न्यायालयीन कोठडीची मागणी केली होती (Viky Nagrale sentenced to judicial custody).

यापूर्वी आरोपीला चार दिवसांची पोलीस कोठडी देण्यात आली होती. घटनेची गंभीरता पाहता पोलिसांनी आरोपीला जिल्ह्याच्या विविध पोलीस ठाण्यात ठेवले होते. पीसीआर दरम्यान पोलिसांकडून साहित्य जप्त करण्यात आले आहे (Viky Nagrale sentenced to judicial custody).

हिंगणघाट जळीतकांड प्रकरण

30 वर्षीय प्राध्यापिका दररोज सकाळी कामावर जाताना आरोपी विक्की नगराळे तिचा पाठलाग करायचा. सोमवारी 3 फेब्रुवारी रोजी नेहमीप्रमाणे शिक्षिका कॉलेजमध्ये शिकवायला जात असताना आरोपी तिचा पाठलाग करत होता. हिंगणघाट शहरातील एका चौकात येताच आरोपीने तिच्यावर पेट्रोल ओतून तिला जाळण्याचा प्रयत्न केला. यामध्ये ती 20 ते 30 टक्के भाजली. तिच्यावर नागपुरात उपचार सुरु आहेत. या पीडित तरुणीची प्रकृती चिंताजनक असून तिची मृत्यूशी झुंज सुरु आहे. पीडितेची प्रकृती चिंताजनक असल्याची माहिती आहे. आरोपी हा शिक्षिका राहत असलेल्या दारोडा गावातीलच आहे.