पती-मुलांना ट्रकमध्ये कोंडून कासुर्डी टोलनाक्यावर गँगरेप, बारामती सत्र न्यायालयाचा मोठा निकाल
नोव्हेंबर 2012 मध्ये पीडित महिला पती आणि मुलांसह ट्रकने सोलापूरहून पनवेलला जात होती. त्यावेळी पोलिस असल्याचे भासवून आरोपींनी ट्रक थांबवला होता.
बारामती : पुण्यातील कासुर्डी टोलनाक्यावर सात वर्षांपूर्वी झालेल्या सामूहिक बलात्कार प्रकरणी न्यायालयाने मोठा निकाल दिला आहे. सामूहिक बलात्कार, अपहरण आणि जबरी चोरी प्रकरणी बारामती सत्र न्यायालयाने तिघा आरोपींना आजन्म कारावास ठोठावला आहे. (Kasurdi Toll Naka Rape Baramati Court)
पुण्यातील कासुर्डी टोलनाक्याजवळ 22 नोव्हेंबर 2012 रोजी ही घटना घडली होती. पीडित महिला पती आणि मुलांसह ट्रकने सोलापूरहून पनवेलला जात होती. त्यावेळी पोलिस असल्याचे भासवून आरोपी अशोक आत्माराम येडके, गणेश सुभाष वैरागे, गौरव गंडप्पा जमादार यांनी ट्रक थांबवला.
पीडित महिलेचा पती आणि मुलांना आरोपींनी चाकूच्या धाकाने केबिनमध्ये कोंडून ठेवलं. त्यानंतर तिला ट्रकच्या पाठी नेत तिघांनी आळीपाळीने बलात्कार केला होता. आरोपींचं क्रौर्य इतकं होतं, की एक आरोपी महिलेच्या हातांवर पाय ठेवून उभा राहिला, आणि इतरांनी तिच्यावर अत्याचार केले.
हेही वाचा – डीजे लावण्यावरुन वाद, फेअरवेल पार्टीला गेलेल्या विद्यार्थ्यांना बाऊन्सरकडून मारहाण
बारामतीचे जिल्हा आणि सत्र न्यायाधीश आर. आर. राठी यांनी आरोपींना शिक्षा ठोठावली आहे. कलम 376 2 (जी) आणि 394 नुसार तिन्ही आरोपींना आजन्म कारावास आणि 10 हजार रुपयांचा दंड ठोठावण्यात आला आहे. दंड न भरल्यास सहा महिने कारावासाची शिक्षा आरोपींना भोगावी लागणार आहे.
आरोपींनी याआधीही टोलनाक्यावर लूटमार केल्याचं पोलिस तपासात समोर आलं. लुटलेल्या व्यक्तीचं ओळखपत्र घटनास्थळी टाकून त्याला आरोपी भासवण्याचा प्रयत्न करायचा, ही आरोपींची मोडस ऑपरेंडी असल्याचं तपासात निष्पन्न झालं. (Kasurdi Toll Naka Rape Baramati Court)