राष्ट्रवादीच्या महिला प्रदेशाध्यक्षा रुपाली चाकणकरांविषयी अश्लील कमेंट्स, पुण्यात सहा जणांवर गुन्हा
राष्ट्रवादीच्या नेत्या रुपाली चाकणकर यांच्या फेसबुक पोस्टवर सहा जण वारंवार अश्लील कमेंट्स करत होते, त्यांच्यावर पुण्यात गुन्हा दाखल करण्यात आला आहे (Pune Facebook users booked for vulgar comments on Rupali Chakankar social media post)
पुणे : राष्ट्रवादी महिला काँग्रेसच्या महाराष्ट्र प्रदेशाध्यक्षा रुपाली चाकणकर यांच्याविषयी सोशल मीडियावर अश्लील कमेंट्स करणं टवाळखोरांना चांगलंच महागात पडलं आहे. पुण्यात सहा जणांविरोधात गुन्हा दाखल करण्यात आला आहे. (Pune NCP Leader Rupali Chakankar social media post)
राष्ट्रवादीच्या नेत्या रुपाली चाकणकर यांच्या फेसबुक पोस्टवर सहा जण वारंवार अश्लील कमेंट्स करत होते. चाकणकर यांनी ट्विटरवर काही दिवसांपूर्वी पंतप्रधान नरेंद्र मोदी यांच्याविषयी ट्वीट केलं होतं. या टीकेचा राग मनात धरुन सहा जण रुपाली चाकणकर यांच्या फेसबुक पोस्टवर अश्लील शेरेबाजी करत असल्याचा आरोप आहे.
पुण्यातील सिंहगड रोड परिसरात हा प्रकार घडला असून तक्रारीनंतर पोलिसांनी सहा जणांविरोधात गुन्हा दाखल केला आहे. कलम 354 अ आणि ड अंतर्गत विनयभंग आणि आयटी अॅक्टनुसार गुन्हा नोंदवण्यात आला आहे.
हेही वाचा : आम्ही हिरोईन आहोतच, पण…, रुपाली चाकणकर यांचा लोणीकरांना इशारा
‘कोरोना’च्या संकटकाळात प्रत्येक जण आपापल्या परीने एकमेकांची मदत करत आहे. रुपाली चाकणकर राष्ट्रवादीच्या कार्यकर्त्या आणि पदाधिकाऱ्यांनी केलेल्या मदतीची माहिती ट्विटरवर देत आहेत. मात्र काहीच दिवसांपूर्वी चाकणकर यांनी पंतप्रधान नरेंद्र मोदी यांनी दुजाभाव केल्याचे ट्वीट केले होते.
केंद्राकडे साडेतीन लाख पीपीई किट्स आणि आठ लाख N-95 मास्कची मागणी केली असताना, महाराष्ट्राला फक्त 30 हजार पीपीई किट्स आणि एक लाख N-95 मास्क पाठवल्याने चाकणकर यांनी केंद्र सरकारवर निशाणा साधला होता. महाराष्ट्राच्या जीवाशी खेळू नका असा इशाराही त्यांनी दिला होता.
महाराष्ट्राने केंद्राकडे ३.५ लाख PPE किट आणि ८ लाख N-95 मास्कची मागणी केली असता फक्त ३० हजार PPE किट्स आणि १ लाख N-95 मास्क दिले आहेत. केंद्राच्या अशा दुजाभावामुळे जर केसेस वाढल्या तर केंद्र याची जबाबदारी घेणार आहे का?@narendramodi महाराष्ट्राच्या जीवाशी खेळू नका.@MHVaghadi
— Rupali Chakankar (@ChakankarSpeaks) April 19, 2020
(Pune NCP Leader Rupali Chakankar social media post)