जगातील सर्वाधिक लांबीचा काचेचा स्कायवॉक अमरावतीत, नवनीत राणांकडून पाहणी

अमरावती : विदर्भाचं काश्मीर म्हणून प्रसिद्ध असलेल्या अमरावतीच्या चिखलदरा येथे लवकरच जगातील सर्वाधिक लांबीचा काचेचा स्कायवॉक उभारला जाणार (Longest Glass Bridge in Amravati) आहे. चिखलदरा पर्यटन विकासाच्या आराखड्यात या स्कायवॉकचा समावेश करण्यात आला आहे. नुकतंच अपक्ष खासदार नवनीत राणा आणि आमदार रवी राणा यांनी या स्कायवॉकच्या बांधकामाची पाहणी केली.

अमरावतीमध्ये चिखलदरा येथे स्कायवॉकची सुविधा पर्यटकांसाठी उपलब्ध होणार आहे. या स्कायवॉकची लांबी 500 मीटर इतकी असणार आहे. आतापर्यंत त्याचे 35 टक्के काम पूर्ण झाले आहे. या स्कायवॉकसाठीचे एकूण बजेट 34 कोटी रुपये आहेत. या स्कायवॉकचे बांधकाम पूर्ण करण्यासाठी 2 वर्षांचा कालावधी लागणार आहे.

चिखलदऱ्यात होणारा हा पूल भारतातील पहिला काचेचा स्कायवॉक असणार आहे. चिखलदरातील गोराघाट पॉईंटपासून ते हरीकेन पॉंईंटपर्यंत हा स्कायवॉक असेल. सध्या या प्रकल्पाचे काम जलदगतीने सुरु (Longest Glass Bridge in Amravati) आहे.

हा स्कायवॉक भारतातील पहिला आणि जगातील तिसरा हा गगनभरारी पूल असणार आहे. या स्कायवॉकने दोन मोठ्या टेकड्यांना जोडलं जाणार आहे. हा स्कायवॉक पूर्णपणे काचेचा असणार आहे. यामुळे चिखलदऱ्यामध्ये येणाऱ्या पर्यटकांकरिता एक नवं आकर्षण निर्माण होणार आहे.

स्कायवॉकचे बांधकाम पूर्ण झाल्यानंतर या भागात पर्यटकांची संख्या वाढेल. मेळघाटातील चिखलदरा हा भाग सिडकोद्वारे विकसित करण्यात येत आहे. त्यामुळे आता अमरावतीच्या चिखलदऱ्यामध्ये देशातून पर्यटकांची गर्दी वाढेल, अशी प्रतिक्रिया अमरावतीच्या खासदार नवनीत राणा यांनी व्यक्त केली.

या जगात स्वित्झर्लंड आणि चायना या ठिकाणी स्कायवॉक आहे. स्वित्झर्लंडचा स्कायवॉक हा 397 मीटरचा आहे. तर चीनमधील स्कायवॉक 360 मीटरचा आहे. त्यामुळे चिखलदरा येथे होत असलेला स्कायवॉक हा जगातील तिसरा सर्वात मोठा स्कायवॉक असणार आहे. चिखलदरा येथे होणारा हा स्कायवॉक 500 मीटर असेल. त्यासाठी 34 कोटी रुपये लागणार (Longest Glass Bridge in Amravati) आहे.