Video : Amravati Encroachment : अमरावतीतील अतिक्रमण हटाव मोहीम, प्रवीण पोटे-मनपा अधिकारी आमनेसामने, व्यापारीही संतप्त
मनपाचे अधिकारी म्हणतात, आधी सूचना दिली होती. सार्वजनिक जागेवरील अतिक्रमण हटवा, असं सांगितलं होतं. याठिकाणी अपघात होतात. सर्वसामान्य नागरिकांना त्रास होतो. वाहतुकीची समस्या निर्माण होते.
अमरावती : शहरातील बाजारपेठेतील (City market) अतिक्रमण काढण्यावरून भाजप आमदार प्रवीण पोटे आणि मनपा अतिक्रमण अधिकारी (Municipal Officers) यांच्या खडाजंगी झाली. गेल्या दोन दिवसांपासून शहरात बाजारपेठमधील अतिक्रमणाची कारवाई सुरू आहे. प्रवीण पोटे यांनी अधिकाऱ्यांना धारेवर धरले. मी अडथळा निर्माण करतो म्हणून माझ्याविरोधात 353 चा गुन्हा दाखल करा, असंही प्रवीण पोटे (Praveen Pote) म्हणाले. दोन दिवसांपूर्वी तुम्हाला पत्र द्यायला हवं होतं, असं पोटे यांनी मनपा अधिकाऱ्यांना सांगितलं. वाईन बार वाचविण्यासाठी आले तुम्ही, असा आरोप एकानं पोटे यांच्यावर केला. तेव्हा बाईनबारवाले काही माझे नातेवाईक नसल्याचं पोटे म्हणाले. मनपाचे अधिकारी म्हणतात, आधी सूचना दिली होती. सार्वजनिक जागेवरील अतिक्रमण हटवा, असं सांगितलं होतं. याठिकाणी अपघात होतात. सर्वसामान्य नागरिकांना त्रास होतो. वाहतुकीची समस्या निर्माण होते. त्यामुळं अतिक्रमण हटविल्याचं अधिकारी म्हणतात.
मनपाविरोधात व्यापारीही संतप्त
अतिक्रमण काढणे सुरू असल्याने व्यापारी आक्रमक झालेत. सुरुवातीला राजकमल चौक ते गांधी चौकापर्यंतचे अतिक्रमण हटविण्यात आले. आज दुपारी बारा वाजताच्या सुमारास बापट चौकातील अतिक्रमण हटविण्यात आले. व्यापारी म्हणाले, आम्हाला सांगितलं असतं तर आम्ही आधीच अतिक्रमण हटविलं असतं. पण, वेळेवर येऊन अतिक्रमण काढणं चुकीचं आहे. मनपाचे अधिकारी अरेरावी करत असल्याचा आरोप व्यापाऱ्यांनी केला. सांगूनही ते ऐकत नाहीत.
वेळ मागूनही प्रशासनाचा नकार
सुरुवातीला सांगितलं असत तर येवढं नुकसान झालं नसतं, असा दावा व्यापाऱ्यांनी केला. आमची 25 ते 30 वर्षांपासून इथं दुकानं आहेत. स्टे ऑर्डर आमच्याकडं आहे. आम्हाला माल काढण्यासाठी दोन-चार तास वेळ द्या. आम्ही आमच्या दुकानातील माल बाहेर काढतो. म्हणजे नुकसान कमी होईल, असं प्रशासनाला सांगूनही ते ऐकत नसल्याचा आरोप व्यापाऱ्यांनी केलाय. अतिक्रमण हटाव मोहिमेमुळं शहरातील वातावरण चांगलेच तापले होते. पोटे हेही संतापले होते. यामुळं मनपाचे अधिकारी आणि पोटे यांच्यात चांगलीच खडाजंगी उडाली.
