कोरोना म्हणजे फर्जीवाडा, कालीचरण महाराजांची मुक्ताफळे; लोकांना मारून किडनी, डोळे काढल्याचा जावईशोध!

सांगलीः अध्यात्म स्वःचा शोध घेण्याचे सगळ्याचे महत्त्वाचे माध्यम मानले जाते. तो कसा घ्यावा, त्यासाठी कोणता पंथ, धर्म अंगीकारावा हा ज्याचा-त्याचा प्रश्न. या शोधात थोडेफार सहकार्य करायचे काम गुरूंनी, महाराजांनी केले जावे, अशी अपेक्षा असते. इथे ते राहिले बाजूलाच. ज्या विषयाचा आपल्याला गंधही नाही, तिथे आपले अगाज्ञ ज्ञान प्रकट करण्याची अहमिका सुरू असते. याचाच प्रत्यय सांगली येथे कालीपुत्र कालीचरण महाराज (Kalicharan Maharaj) यांच्या वक्तव्यात आला. त्यांनी चक्क कोरोना (Corona) म्हणजे फर्जीवाडा असल्याची मुक्ताफळे इथे उधळली. इतकेच काय कोरोनाचे मृत्यू म्हणजे डॉक्टरांनी लोकांना मारले. त्यांच्या किडनी आणि अवयवांची तस्करी केली, असा जावई शोधही त्यांनी लावला. आता त्यांच्या वक्त्व्यावर बोलणार तरी काय?

कोरोना एक षढयंत्र

कालीचरण महाराज म्हणाले की, कोरोना हे एक षढयंत्र आहे. तो फर्जीवाडा आहे. इतकेच नव्हे, तर जागतिक आरोग्य संघटनाही फर्जीवाडा आहे, असा छातीठोक दावा त्यांनी केला. महाराज इतक्यावरच थांबतील तर ते कसले. ते पुढे म्हणाले की, जागतिक आरोग्य संघटनेचे डॉक्टर, वैज्ञानिक आणि कर्मचारी सुद्धा फर्जी आहेत. आता बोला. या महारांजाबाबत प्रतिक्रिया तर द्यायची काय? हे त्यांचे शिष्यच सांगू शकतील. कालीचरण महाराजांनी येथून पुढे तर एकावर एक दावे केले. ते म्हणाले, करोना ही भयानक महामारी नाही. ज्या करोनामुळे लोकांचा मृत्यू झाला, त्या लोकांना डॉक्टरांनी मारले आहे. त्यांच्या शरीरातील किडनी आणि मानवी अवयवांची तस्करी झाली आहे, असा धक्कादायक आरोप त्यांनी केला.

लस विक्रीसाठी धडपड

कालीचरण महाराज म्हणाले, भारतातील प्रजेने ईश्वरनिष्ठ होऊन आयुर्वेदाचे उपचार घ्यावेत. सगळे कोरोने-फिरोने फेल होतील. कशाकाय यांना भविष्यवाण्या सूचतात हो. तिसरी लाट येऊन राह्यली आणि ही लाट येऊन राह्यली. त्यांच्या कंपन्या आहेत व्हॅक्सीनच्या. त्या तिसऱ्या लाटेच्या नावाखाली धडाधड व्हॅक्सीन बनवतात आणि त्या खपवतात. दुसरं काय हाय? हा कोरोना म्हणजे एक मोठे षढयंत्र आहे, असा दावा त्यांनी केला.

70-80 वर्ष मजा करा

कालीचरण महाराज पुढे म्हणाले की, जागतिक आरोग्य संघटनेचे लसीच्या कंपन्यासोबत संगणमत आहे. अमुक एक लस विकली गेली पाहिजे म्हणून ते भीती उत्पन्न करतात. लोकांना मारणे सुरू आहे. त्यांचे मृतदेह लपेटून टाकून दिले जात आहेत. त्यांच्या किडन्या काढल्या, हार्ट काढले, डोळे काढले काय माहित. लोकांना मारून फेकत आहेत. पुढचे सत्तर-ऐंशी वर्ष मजा करून घ्या. त्यानंतर हे लोक बारा हजार वर्षे नरकात सडतील, असा दावाही त्यांनी केला.

इतर बातम्याः

साहित्य संमेलनात राजकीय कलगीतुरा; महापौरांचा बहिष्कार, भाजप नेत्यांची नावे नसल्याने नाराज

फडणवीसांनी मिळवलेले मराठा आरक्षण महाविकास आघाडी सरकारने घालवले, विनायक मेटेंचा हल्लाबोल