जालन्यात मारहाण झालेल्या प्रेमी युगुलाचं बुलडाण्यात शुभमंगल

बुलडाणा : जालन्यात टोळक्याने प्रेमी युगुलाला बेदम मारहाण केल्याचा संतापजनक प्रकार समोर आला होता. या प्रेमी युगलाचं बुलढाण्यात शुभमंगल झालं आहे (Jalna Couple Beaten). बुलढाण्याच्या मेंढगावातील मंदिरात त्यांनी लग्न केलं आहे. त्यांच्या लग्नाचे फोटो सध्या सोशल मीडियावर व्हायरल होत आहेत (Jalna Couple Beaten).

काय आहे नेमकं प्रकरण :

बुलडाणा जिल्ह्यातील एक प्रेमी युगल काही दिवसांपूर्वी जालन्यातील गोंदेगावात फिरायला गेले होते. यावेळी तळ्याच्या दिशेने जाणाऱ्या दोघांना टोळक्याने गाठलं आणि धमकावायला सुरुवात केली.

‘आम्ही काहीही चुकीचं केलेलं नाही. तळं असल्यामुळे आम्ही फिरायला आलो’ असं तरुण काकुळतीला येऊन चौघांना सांगत होता. अगदी टोळक्याच्या हाता-पाया पडून त्याने माफी मागण्याचा केविलवाणा प्रयत्नही केला. मात्र मस्तवाल तरुणांनी तरुणीच्या वडिलांना फोन करण्यास सांगितलं.

संपूर्ण व्हिडीओमध्ये गावगुंड तरुणीची कॉलर पकडून तिला फरपटत नेताना दिसत आहे. तरुण सारखं ‘दादा, तिला सोडा, आम्ही परत येणार नाही’ अशा शब्दात गयावया केल्या. तरुणाने आपल्या भावाला फोन लावून बोलवून घेण्याचीही विनंती केल्याचं व्हिडीओत दिसतं.

प्रेमी युगुलाला मारहाण होतानाचा व्हिडीओ सोशल मीडियावर व्हायरल झाल्यानंतर एकच खळबळ उडाली. सर्वच स्तरातून या घटनेचा निषेध व्यक्त करण्यात आला.

आरोपींच्या पोलीस कोठडीत वाढ

दरम्यान, या प्रकरणी जालना पोलिसांनी मुख्य आरोपीसह 4 जणांना अटक केली होती. अतिष खंदारे असे या प्रकरणातील मुख्य आरोपीचे नाव आहे. त्यांना 1 फेब्रुवारी रोजी अटक करण्यात आली होती. या आरोपींना 4 दिवसांची पोलीस कोठडी सुनावण्यात आली होती. त्यानंतर आज पुन्हा त्यांना कोर्टात हजर करण्यात आलं. कोर्टाने त्यांच्या पोलीस कोठडीत आणखी एका दिवसांची वाढ केली आहे.