मुलाचा घरी गळफास ; दुःख सहन न झाल्याने आईचाही शेतात गळफास

लातूर : मुलाच्या आत्महत्येची बातमी ऐकून आईनेही आत्महत्या करत आपलं जीवन संपवल्याची धक्कादायक घटना लातूरमध्ये घडली. लातूरच्या निलंगा तालुक्यातील निठुर येथे ही हृदयद्रावक घटना घडली. या माय-लेकाच्या मृत्यूने निठुर गावात शोककळा पसरली आहे.

निठुर गावात नितीन सुभाष घोडके हा 30 वर्षीय तरुण आपल्या आई आशाबाई (50) सोबत राहायचा. शुक्रवारी नितीनने आई शेतात गेली असताना आपल्या राहत्या घरी गळफास घेत आत्महत्या केली. मुलाने आत्महत्या केल्याचं जेव्हा आशाबाई यांना सांगण्यात आलं, तेव्हा त्यांच्या पायाखालची जमीनच सरकली. म्हातारपणात ज्या मुलाच्या आधारे आपल्याला जगायचे होते, तो आधारच आता राहिलेला नाही, आपल्या मुलाचा मृत्यू झाला आहे, याचे दुःख आशाबाईंना सहन झाले नाही. त्यामुळे त्यांनीही शेतातच स्वत:ला गळफास लावून घेतला.

आधी मुलगा आणि त्याच्या विरहात आईने आपले जीवन संपवल्याने निठुर गावात सर्वत्र हळहळ व्यक्त होत आहे. मात्र नितीन घोडकेने आत्महत्या का केली याचं कारण अद्यापही अस्पष्ट आहे.