बाळाला वाचवताना गंभीर दुखापत, 14 वर्षांच्या साक्षीला नवा पाय मिळणार, उपचाराची संपूर्ण जबाबदारी केईएम घेणार
'केईएम' रुग्णालयामध्ये साक्षी दाभेकरच्या डाव्या पायावर शस्त्रक्रिया करण्यात आली. यावेळी तिचा पाय गुडघ्यापासून खाली कापावा लागला. तालुका स्तरावरील धावपटू विद्यार्थिनीचा पाय कापावा लागल्याने तिच्या भवितव्याविषयी कुटुंबाला चिंता वाटत होती
मुंबई : पोलादपूरमध्ये दरड कोसळताना दोन महिन्यांच्या बाळाला वाचवण्याच्या प्रयत्नात अंगावर भिंत कोसळल्याने गंभीर जखमी झालेल्या 14 वर्षांच्या साक्षी दाभेकरला लवकरच कृत्रिम पाय मिळणार आहे. मुंबईच्या महापौर किशोरी पेडणेकर यांनी केईएम रुग्णालयात जाऊन साक्षीची भेट घेतली. रायगडची रहिवासी असलेल्या साक्षीचा पाय शस्त्रक्रियेनंतर गुडघ्यापासून खाली कापण्याची वेळ आली होती. त्यामुळे कुटुंबासमोर मोठं आर्थिक संकट उभं राहिलं होतं. मात्र साक्षीच्या पुढील उपचाराची संपूर्ण जबाबदारी महापालिकेच्या केईएम हॉस्पिटलद्वारे स्वीकारली जाणार आहे.
मुंबईच्या महापौर किशोरी पेडणेकर यांनी केईएम रुग्णालयात जाऊन साक्षीची भेट घेतली. शिवसेनेकडून साक्षी दाभेकरच्या कुटुंबियांना तातडीची मदत म्हणून आजच एक लाख रुपयांचा धनादेश सुपूर्द करण्यात आला. साक्षी दाभेकरला लवकरच कृत्रिम पाय मिळणार आहे. सरकारने आपल्या मुलीच्या शौर्याची दखल घ्यावी आणि तिला पुढील उपचारासाठी मदत करावी अशी मागणी कुटुंबियांनी केली होती.
नेमकं काय घडलं?
रायगड जिल्ह्यात दोन आठवड्यांपूर्वी गंभीर पूरस्थिती निर्माण झाली होती. अनेक ठिकाणी दरड कोसळण्याच्या घटनाही समोर आल्या. यावेळी पोलादपूर तालुक्यातील केवनाळे गावात 14 वर्षांच्या साक्षी दाभेकर हिने धिटाईने दोन महिन्यांच्या मुलाचे प्राण वाचवले. मात्र भिंत अंगावर कोसळल्यामुळे साक्षी जबर जखमी झाली.
पाय गुडघ्यापासून खाली कापला
साक्षीला तातडीने रायगडहून मुंबईत हलवण्यात आले. ‘केईएम’ रुग्णालयामध्ये तिच्या डाव्या पायावर शस्त्रक्रिया करण्यात आली. यावेळी दुर्दैवाने तिचा पाय गुडघ्यापासून खाली कापावा लागला. तालुका स्तरावरील धावपटू विद्यार्थिनीचा पाय कापावा लागल्याने तिच्या भवितव्याविषयी कुटुंबीयांच्या मनात चितेंचं वातावरण होतं.
कृत्रिम पाय बसवण्यासाठी मदतीचं आवाहन
14 वर्षांची साक्षी दाभेकर धावपटू आहे. कबड्डी आणि खो खो हे क्रीडा प्रकार ती तालुका स्तरावर खेळते. पण आता तिला पाय गमवावा लागला. लेकीची परिस्थिती बघून त्यांना अश्रू अनावर होतात. त्यामुळे साक्षीला कृत्रिम पाय बसवण्यासाठी आणि साक्षीच्या भवितव्यासाठी दाभेकर कुटुंबाला ज्यांना आर्थिक मदत करायची असेल, त्यांच्यासाठी बँक खात्याचे तपशील जारी करण्यात आले आहेत.
साक्षी दाभेकरला मदत करण्यासाठी बँक तपशील :
नाव – Pratiksha Narayan Dabhekar
Bank of India, Poladpur branch
A/c – 120310510002839
IFSC code – BKID 0001203
MICR – 402013520
संबंधित बातम्या :
दरडीतून बाळाला वाचवताना भिंत कोसळली, 14 वर्षांच्या धावपटूचा पाय कापण्याची वेळ, आर्थिक मदतीचं आवाहन
(Raigad Landslide Poladpur 14 years old runner Sakshi Dabhekar Leg cut after operation KEM Hospital to take responsibility)
