लासलगाव ग्रामपंचायत ऑनलाइन सेवा देण्यात देशात नंबर एक, बहुतांश कामे पेपरलेस…!
नाशिक जिल्ह्यातली कांद्याची जगप्रसिद्ध बाजारपेठ असणाऱ्या लासलगाव येथील ग्रामपंचायत नागरिकांना ऑनलाइन सेवा देण्यात देशात अव्वल ठरलीय. ही सेवा देणारे आपले सरकार चालक बाबा गिते यांचा त्याबद्दल दिल्ली येथे सन्मान करण्यात आला. या यशाबद्दल गिते यांचे जिल्ह्यातून कौतुक करण्यात येत आहे. ग्रामपंचायतीच्या वतीनेही त्यांचे अभिनंदन करण्यात आले.
लासलगावः नाशिक (Nashik) जिल्ह्यातली कांद्याची जगप्रसिद्ध बाजारपेठ असणाऱ्या लासलगाव (Lasalgaon) येथील ग्रामपंचायत नागरिकांना ऑनलाइन सेवा (Online Service) देण्यात देशात अव्वल ठरलीय. कॉमन सर्व्हिस सेंटर अंतर्गत नागरिकांना अनेक सेवा एकाच ठिकाणाहून देणाऱ्या देशातील 525 आणि महाराष्ट्रातील 61 पैकी नाशिक जिल्ह्यातल्या 8 आपले सरकार केंद्र चालकांची सीएससी एसपीव्ही कंपनीकडून निवड करण्यात आली. त्यात लासलगावचे बाबा गिते, दुगावचे शुभम खैरे, सिन्नरचे सचिन गिते, देवळालीचे निलेश नागरे, मालेगावचे चंद्रकांत देसले, मोहिउद्दीन अन्सारी, अमोल बच्छाव आणि नाशिकचे नासिर शेख यांचा समावेश आहे. या आठ जणांतून लासलगावचे बाबा गिते यांनी पहिला क्रमांक पटकावला आहे. या यशाबद्दल बाबा गिते यांचे जिल्ह्यातून कौतुक करण्यात येत आहे. ग्रामपंचायतीच्या वतीनेही त्यांचे अभिनंदन करण्यात आले.
दिल्लीत झाला गौरव
देशातील सर्वोच्च अशा सेवा देणाऱ्या नाशिक जिल्ह्यातल्या या आठ संगणक चालकांची 29 मार्च 2022 रोजी झालेल्या दिल्ली येथील इंडिया हॅबिटेट सेंटरमध्ये आयोजित एकदिवसीय कार्यशाळेसाठी निवड झाली होती. येथे या संगणक चालकांचा गौरव करण्यात आला. लासलगावचे संगणक चालक बाबा गिते यांनी दैनंदिन कामकाज करून नागरिकांना इतर सर्व शासकीय विभागातील सेवा उपलब्ध करून दिल्याबद्दल त्यांचा गौरव करण्यात आला. गिते यांच्या या सन्मानाबद्दल आनंद झाला आहे, अशी प्रतिक्रिया लासलगावचे सरपंच जयदत्त होळकर यांनी दिली आहे.
सब कुछ ऑनलाइन
लासलगाव ग्रामपंचायतीध्ये सर्व कार्यालयीन दाखले ऑनलाइन मिळतात. राजपत्र, शॉपअॅक्ट, उद्यम आधार, बँकिंग सेवा, आयुष्यमान भार योजना, शेतकरी सन्मान योजना, कर्जमाफी, मोफत ई-श्रम रजिस्ट्रेशन, पीक विमा, एलआयसी, आरोग्य विमा, वाहनांचा विमा, पोलीस व्हेरिफिकेशन, शालेय विद्यार्थ्यांसाठी महसूल दाखला, नागरिकांना इंटरनेटचा वापर, ऑनलाइन बँकिंग या सुविधा सुरू आहेत. त्यासाठी बाबा गिते हे प्रयत्नशील असतात. त्यामुळे त्यांचा या पुरस्काराने गौरव झाला आहे.
लासलगाव ग्रामपंचायतीमध्ये बहुतांश कामे ऑनलाइन केली जातात. त्यामुळे वेळ वाचतो. सगळ्या प्रमाणपत्रापासून ते इंटरनेट बँकिंगची सुविधा येथे उपलब्ध आहे. त्यामुळे आमच्या केंद्राचा गौरव झाला. याचा आनंद वाटतो.
– जयदत्त होळकर, सरपंच , लासलगाव ग्रामपंचायत
इतर बातम्याः
