माजी नगरसेवकाने मागितली 20 लाखांची खंडणी; न्यायालयाकडून 3 दिवसांची पोलीस कोठडी

इचलकरंजीः वृद्धेचे घर बळकावण्यासह 20 लाखांची खंडणी मागितल्याप्रकरणी मोक्कांतर्गत कारवाई (Mocca action) करण्यात आलेल्या एस.टी.सरकारचा (S.T.Sarkar) म्होरक्या माजी नगरसेवक संजय शंकरराव तेलनाडे  (Sanjay Shankarao Telnade)याला बुधवारी गावभाग पोलिसांनी अटक केली. त्याला न्यायालयात हजर केले असता तीन दिवसांची पोलिस कोठडी सुनावण्यात आली आहे. या प्रकरणातील संजयचा भाऊ सुनील हा फरारी आहे. त्याच्या शोधासाठी आणि त्याला ताब्यात घेण्यासाठी पोलिसांची पथके रवाना करण्यात आली आहेत.

माजी नगरसेवक संजय तेलनाडेच्या एस.टी. सरकार गँगवार पोलिसांनी दोनदा मोक्कांतर्गत कारवाईनंतर तेलनाडे बंधू फरारी होते. त्यापैकी संजय याला गावभाग पोलिसांनी जानेवारी महिन्यात अटक केली होती.

तेलनाडेसह पाच जणांवर गुन्हा

सध्या तो कारागृहात आहे. 5 मार्च २०२० ला गावभाग पोलRस ठाण्यात पतीच्या संशयास्पद मृत्यूची भीती दाखवत जीवे मारण्याची धमकी देऊन वृद्धेचे घर बळकावण्यासह वीस लाखांची खंडणी मागितल्याप्रकरणी गावभाग पोलिसात तेलनाडे बंधूसह पाचजणांवर गुन्हा दाखल करण्यात आला होता. कारागृहात असलेल्या संजय याला न्यायालयाच्या परवानगीने गावभाग पोलिसांनी ताबा घेतले आहे.

सुनील तेलनाडे फरारी

संजय तेलनाडेला न्यायालयात हजर केले असता 28 मेपर्यंत पोलीस कोठडी सुनावण्यात आली आहे. या गुन्ह्यातील आणखीन तीन संशयितांना यापूर्वीच अटक केली असून, सुनील तेलनाडे हा फरारी आहे. याची माहिती गावभागचे पोलीस निरीक्षक राजू ताशीलदार यांनी दिली. या आधीही संजय तेलनाडेवर पोलिसात तक्रार दाखल करण्यात आली होती, त्याच्यावर अनेक गुन्हे दाखल झाले असून तो कायम आपली दहशत माजवण्यासाठी प्रयत्न करत होता.