‘अग्रलेखांच्या बादशाहा’ची लेखणी विसावली, ज्येष्ठ पत्रकार नीलकंठ खाडिलकर कालवश
नीलकंठ खाडिलकर यांच्या मार्मिक आणि सोप्या भाषेतील अग्रलेखांनी मराठी वृत्तपत्रसृष्टीत धुमाकूळ घातला होता. त्यामुळेच त्यांना 'अग्रलेखांचा बादशाह' अशी बिरुदावली मिळाली.
मुंबई : ‘अग्रलेखांचा बादशाह’ अशी ओळख असलेले ‘नवाकाळ’ दैनिकाचे संपादक, ज्येष्ठ पत्रकार नीलकंठ खाडिलकर यांचं निधन (Journalist Nilkanth Khadilkar passes away) झालं आहे. वयाच्या 85 व्या वर्षी मुंबईतील लीलावती रुग्णालयात त्यांनी अखेरचा श्वास घेतला. मध्यरात्री दीड वाजताच्या सुमारास त्यांची प्राणज्योत मालवली. खाडिलकरांच्या निधनाने पत्रकारिता क्षेत्रावर शोककळा पसरली आहे.
अंतिम दर्शनासाठी खाडिलकरांचं पार्थिव दुपारी 12 ते दोन दरम्यान नवाकाळ दैनिकाच्या गिरगावातील कार्यालयात ठेवण्यात येणार आहे. त्यांच्यावर दुपारी तीन वाजता चंदनवाडी स्मशानभूमीत अंत्यसंस्कार करण्यात येतील. विविध राजकीय नेत्यांनीही खाडिलकरांच्या निधनावर शोक व्यक्त केला आहे.
‘दैनिक नवाकाळ’ या वृत्तपत्राचं संपादकपद नीलकंठ खाडिलकर यांनी 27 वर्ष सांभाळलं होतं. ज्येष्ठ नाटककार आणि ‘केसरी’ चे भूतपूर्व संपादक कृ. प्र. खाडिलकर यांचे ते नातू होते. अर्थशास्त्र विषय घेऊन खाडिलकरांनी बीए ऑनर्स केलं होतं. ते ‘संध्याकाळ’ या नावाचे सायंदैनिकही काढत असत. नीलकंठ खाडिलकर यांचे ‘हिंदुत्व’ हे पुस्तक वाचक-समीक्षकांच्या पसंतीस उतरलं आहे.
खाडिलकर यांच्या मार्मिक आणि सोप्या भाषेतील अग्रलेखांनी मराठी वृत्तपत्रसृष्टीत धुमाकूळ घातला होता. त्यामुळेच त्यांना ‘अग्रलेखांचा बादशाह’ अशी बिरुदावली मिळाली.
नीलकंठ खाडिलकर यांनी आपली लेखणी तळागाळातील लोकांसाठी वापरली. अग्रलेखांच्या जोरावर खाडिलकर यांनी ‘नवाकाळ’ला वेगळी उंची प्राप्त करुन दिली. खाडिलकर हे एक उत्तम मुलाखतकारही होते. त्यांनी घेतलेल्या अनेक मुलाखती गाजल्या आहेत.
ज्येष्ठ पत्रकार, प्रख्यात मुलाखतकार आणि दै. नवाकाळचे संपादक नीलकंठ खाडिलकर काळाच्या पडद्याआड गेल्याचे दुखःद वृत्त समजले. अग्रलेखांचे बादशाह निळुभाऊंनी धारदार लेखणीच्या माध्यमातून नोकरशाही- राज्यकर्त्यांच्या कार्यपद्धतीवर अंकुश ठेवला; ऱ्हासाधीन व्यवस्थेवर मार्मिक ओरखडे ओढले. pic.twitter.com/mlgo2t2n3w
— Sharad Pawar (@PawarSpeaks) November 22, 2019
ज्येष्ठ पत्रकार, संपादक श्री नीलकंठ खाडिलकर यांनी आपल्या लेखणीतून अनेक प्रश्नांना वाचा फोडली. वैचारिक मंथनातून समाजमन घडविण्याची क्षमता त्यांच्या लेखणीत होती. आज ते आपल्यात नाहीत. त्यांना मी विनम्र श्रद्धांजली अर्पण करतो. त्यांचे कुटुंबीय, आप्तस्वकीयांच्या दुःखात मी सहभागी आहे..
— Devendra Fadnavis (@Dev_Fadnavis) November 22, 2019
ज्येष्ठ पत्रकार, दै. नवाकाळचे संपादक नीलकंठ खाडिलकर यांच्या निधनामुळे सर्वसामान्य जनतेचा आवाज बुलंद करणारे अग्रलेखांचे बादशहा काळाच्या पडद्याआड गेले आहेत. नीलकंठ खाडिलकर यांना भावपूर्ण श्रद्धांजली. pic.twitter.com/NLijcIEp8j
— Balasaheb Thorat (@bb_thorat) November 22, 2019
नीलकंठ खाडिलकर यांना मिळालेले पुरस्कार आणि सन्मान
भारत सरकारकडून पद्मश्री
महाराष्ट्र सरकारचा पत्रकारितेचा पहिला लोकमान्य टिळक जीवनगौरव पुरस्कार (2008)
मुंबई मराठी पत्रकार संघाचे दोनदा अध्यक्षपद
‘चौफेर’ कऱ्हाडतर्फे ‘सुधारक’कार गोपाळ गणेश आगरकर पुरस्कार (2011)
मराठी पत्रकार संघातर्फे आचार्य अत्रे पुरस्कार
लोकमान्य टिळक राष्ट्रीय पत्रकारिता पुरस्कार (2017)
Journalist Nilkanth Khadilkar passes away
शंभराव्या अखिल भारतीय नाट्य संमेलनाच्या अध्यक्षपदी डॉ.जब्बार पटेल