बहिणीच्या अंत्यविधीसाठी जाताना दोन सख्ख्या भावांचा मृत्यू
चुलत बहिणीच्या अंत्यविधीसाठी निघालेल्या दोन सख्ख्या भावांचा नांदेडमधील लिंबगावजवळ अपघातात मृत्यू झाला आहे. संजय गव्हाणे आणि नारायण गव्हाणे अशी अपघातात मृत झालेल्या दोघांची नावे आहेत.
नांदेड : चुलत बहिणीच्या अंत्यविधीसाठी निघालेल्या दोन सख्ख्या भावांचा नांदेडमधील लिंबगावजवळ अपघातात मृत्यू झाला आहे. संजय गव्हाणे आणि नारायण गव्हाणे अशी अपघातात मृत झालेल्या दोघांची नावे आहेत. ऐन रक्षाबंधनाच्या दिवशी ही दुर्देवी घटना घडल्याने परभणीतील कमळापूर गावात शोककळा पसरली आहे.
संजय गव्हाणे आणि नारायण गव्हाणे हे दोघेही आपल्या चुलत बहिणीच्या अंत्यसंस्कारासाठी मोटारसायकलने जात होते. त्याचवेळी नांदेडमधील लिंबगाव या ठिकाणी एका काराने त्यांच्या मोटारसायकलला धडक दिली. ही धडक इतकी भीषण होती की, त्या दोघांचा जागीच मृत्यू झाला.
संपूर्ण देशभरात आज रक्षांबधन उत्साह पाहायला मिळत आहे. मात्र त्या दिवशी गव्हाणे कुटुंबियांवर मात्र दुखाचा डोंगर कोसळला आहे. संजय गव्हाणे आणि नारायण गव्हाणे हे दोघेही परभणीतील कमळापूर गावातील रहिवाशी होते.
दरम्यान या अपघाताप्रकरणी लिंबगाव पोलिसांनी गुन्हा दाखल केला आहे. दुचाकीला धडक देणाऱ्या कारलाही पोलिसांनी जप्त केले आहे. ही गाडी नेमकी कोण चालवत होतं याचा शोध सध्या पोलीस घेत आहेत.