धनंजय मुंडे यांनी संबंध लपवून का ठेवले? आताच सांगण्याची वेळ का आली?

मुंबई : सामाजिक न्यायमंत्री धनंजय मुंडे यांच्याविरोधात गायिका रेणू शर्मा यांनी बलात्काराची तक्रार केली आहे. याबाबत समाज माध्यमं आणि प्रसारमाध्यमांवर बातमी समोर आल्यानंतर धनंजय मुंडे यांनी फेसबुकवर आपली भूमिका स्पष्ट केली आहे. मुंडे यांनी “2003 सालापासून करुणा शर्मा नावाच्या एका महिलेसोबत परस्पर सहमतीने संबंधात होतो. या संबंधामधून त्यांना एक मुलगा आणि एक मुलगी अशी दोन मुले झाली”, अशी कबुली दिली आहे. मात्र, मुंडेंनी इतके वर्ष संबंध का लपून ठेवले आणि त्यांच्यावर आताच हे संबंध सांगण्याची का वेळ आली? हा देखील महत्त्वाचा मुद्दा आहे (Rape allegations on Dhananjay Munde).

धनंजय मुंडे हे अनेक वर्षांपासून राजकारणात सक्रीय आहेत. राजकारणातील व्यक्तीच्या चारित्र्यावर लोकांचा प्रचंड विश्वास असतो. एखाद्या राजकारणीच्या चारित्र्याला डाग लागला तर त्या व्यक्तीची संपूर्ण राजकीय कारकिर्द धोक्यात जाण्याची शक्यता आहे. कदाचित याच विचारातून मुंडे यांनी आपले संबंध सार्वजनिक केले नसावेत. मुंडे सध्या राज्य सरकारमध्ये मंत्री आहेत. याशिवाय राष्ट्रवादी काँग्रेस पक्षात त्यांना मोठं स्थान आहे. शेकडो कार्यकर्ते त्यांना मानतात, त्यांचा आदर करतात. त्यामुळे या खाजगी गोष्टी सर्वांसमोर जाहीर करणं मुंडेंना जास्त महत्त्वाचं वाटत नसावं.

धनंजय मुंडे यांच्याविरोधात रेणू शर्मा यांनी बलात्काराची तक्रार केली आहे. रेणू शर्मा या करुणा शर्मा यांच्या लहाण बहीण आहेत, अशी माहिती मुंडे यांनी स्वत: फेसबुकवर दिली आहे. रेणू शर्मा यांनी पोलिसात आधी तक्रार केली. मात्र, सुरुवातीला पोलिसांकडून त्यांना हवा तसा प्रतिसाद मिळाला नाही, असा आरोप त्यांनी केला आहे. रेणू शर्मा यांनी ट्विटरवर मुख्यमंत्री उद्धव ठाकरेंसह अनेकांना टॅग करत आपली तक्रार केली. त्यांच्या या तक्रारीची दखल मुंबई पोलिसांनी घेतली.

दरम्यान, सोशल मीडियावर मुंडे यांच्यावर बलात्काराची तक्रार दाखल झाल्याबाबतची बातमी व्हायरल होऊ लागली. त्यानंतर नेटीझन्सकडून संमिश्र प्रतिक्रिया येऊ लागल्या. हे प्रकरण आता पोलिसात गेल्याने धनंजय मुंडे यांनी स्वत: हून फेसबुकवर पोस्ट टाकत आपली बाजू मांडली. तक्रारदार महिला आणि तिचा भाऊ आपल्याला ब्लॅकमेल करुन खंडणीदेखील मागत असल्याचं मुंडे यांनी सांगितलं आहे (Rape allegations on Dhananjay Munde).

धनंजय मुंडे नेमकं काय म्हणाले?

कालपासून समाज माध्यमांमधून माझ्याविषयी काही कागदपत्र प्रसारित होत असल्याचे तसेच मीडिया आणि सोशल मिडियाद्वारे माझ्यावर बलात्काराचे आरोप करण्यात येत आहेत. सदर प्रकरणी रेणू शर्मा नावाच्या एका महिलेने (या रेणु शर्मा या करुणा शर्मा यांच्या सख्या लहान बहीण आहेत) स्वतः त्यांच्या खात्यावरून ट्विट केले आहे. माझ्याविरुद्ध काही तक्रार दाखल केल्याचा उल्लेख त्या कागदपत्रांमध्ये दिसून येतो. हे सर्व आरोप खोटे माझी बदनामी करणारे आणि मला ब्लॅंकमेल करणारे असून या प्रकरणाची संपूर्ण वस्तुस्थिती खालील प्रमाणे आहे.

करूणा शर्मा नावाच्या एका महिलेसोबत मी 2003 पासून परस्पर सहमतीने संबंधांत होतो. ही बाब माझे कुटुंबीय, पत्नी आणि मित्र परिवार यांना अवगत होती. सदर परस्पर सहमतीच्या संबंधामधून आम्हाला एक मुलगा आणि एक मुलगी अशी दोन मुले झाली. सदर दोन्ही मुलांना मी माझे नाव दिले आहे. शाळेच्या दाखल्यापासून ते सर्व कागदपत्रांमध्ये या मुलांना पालक म्हणून माझेच नाव आहे. ही मुले माझ्यासोबतच राहतात. माझे कुटुंबीय, पत्नी आणि माझी मुले यांनी देखील या मुलांना कुटुंबीय म्हणून सामावून घेतले असून स्वीकृती दिलेली आहे.

सदर करुणा शर्मा नावाची महिला माझ्या मुलांची माता असल्यामुळे त्यांची मी सर्वोतोपरी पालनपोषणाची जबाबदारी स्वीकारली आहे. मी त्यांना मुंबईत सदनिका घेण्यास मदत केली आहे. मी त्यांना विमा पॉलिसी आणि त्यांच्या भावाला व्यवसाय स्थापित करण्यास मदत केलेली आहे. या सर्व कृती मी सद्भावनेने केलेल्या आहेत.

मात्र 2019 पासून करूणा शर्मा त्यांची बहीण रेणू शर्मा यांनी मला ब्लॅकमेल करुन पैशाची मागणी करण्यास सुरुवात केली. माझ्या जिवीतीला गंभीर शारीरिक इजा करण्याच्या, धोका करण्याच्या धमक्या सुद्धा देण्यात आल्या. या सर्व प्रक्रियेत त्यांचा भाऊ ब्रिजेश शर्मा देखील सहभागी होता.

या बाबत 12 नोव्हेंबर 2020 रोजी मे 2019 पासून घडत असलेल्या या सर्व बाबींसंदर्भात पोलीसांकडे तक्रार सुद्धा देण्यात आलेली आहे. नोव्हेंबर 2020 मध्ये श्रीमती करुणा शर्मा यांनी समाज माध्यामावर माझी बदनामी करण्याच्या हेतुने, मला ब्लॅकमेल करण्याच्या हेतुने माझ्याशी संबंधित अगदी व्यक्तिगत आणि खाजगी साहित्य प्रकाशित केले होते. त्यामुळे सदर प्रकरणी मी स्वतः हून न्याय मिळवण्यासाठी उच्च न्यायालयात श्रीमती करुणा शर्मा विरुद्ध याचिका दाखल केली आहे.

सदर याचिकेत उच्च न्यायालयाने श्रीमती करुणा शर्मा यांच्या विरोधात असे साहित्य प्रकाशित करण्यास प्रतिबंध करणारे आदेश पारित केले आहेत. सदरची याचिका पुढील आणखी सुनावण्यासाठी उच्च न्यायालयासमोर प्रलंबित आहे. आणि त्याच दरम्यान दोन्ही बाजूच्या वकिलांमार्फत समेट/ समझोता घडवून आणण्याची प्रक्रिया सुद्धा सुरू आहे. या संदर्भात श्रीमती करुणा शर्मा यांच्याविरोधात आम्ही स्वतः उच्च न्यायालयात गेलेलो आहोत आणि या सर्व बाबी उच्च न्यायालयाच्या विचाराधीन असल्यामुळे मी अधिक भाष्य करणे योग्य होणार नाही. माझी या संदर्भात प्रसार माध्यमांना देखील विनंती आहे की या प्रकरणी न्यायालयीन प्रक्रियेवर परिणाम होईल म्हणून अधिक भाष्य टाळावे अशी विनंती आहे.

तथापी कालपासून रेणू शर्मा ज्या या करुणा शर्मा यांच्या भगिनी आहेत यांनी माझ्या विरुद्ध खोटे आणि बदनामीकारक आणि माझ्यावर लग्नाच्या बहाण्याने बलात्कार केल्याचा आरोप केल्याची पोस्ट प्रसारित करण्यास सुरुवात केली आहे. तसेच त्यांनी या संदर्भात विविध प्राधिकाऱ्यांकडे केलेल्या तक्रारीच्या प्रतिदेखील समाज माध्यमातून प्रसारित केल्या आहेत. या सर्व तक्रारी खोट्या आहेत, श्रीमती करुणा शर्मा, त्यांची बहीण रेणू शर्मा आणि त्यांचा भाऊ ब्रिजेश शर्मा यांच्या मला ब्लॅकमेल करणे आणि माझ्या कडून खंडणी वसूल करण्याच्याच योजनेचा एक भाग आहे.

माझ्याकडे श्रीमती रेणू शर्मा यांनी त्यांच्या मोबाईल वरून मला ब्लॅंकमेलिंग कोट्यवधी रुपये मागितल्याचे sms रुपी पुरावे आहेत. तसेच मी उच्च न्यायालयात दाखल केलेल्या याचिकेमध्ये श्रीमती करुणा शर्मा यांच्या सोयीने प्रकरण सेटल करावे या साठीच्या दबाव तंत्रासाठीचा सुद्धा हा भाग असू शकतो.

मला खात्री आहे की या सर्व प्रकरणाची संबंधीतांकडून सुयोग्य चौकशी केली जाईल. तथापी माझी आपल्याला विनंती आहे की सदर प्रकरणी वृत्त प्रसिद्ध करताना वरील वस्तुस्थिती लक्षात घ्यावी. कारण सदर प्रकरणी श्रीमती करूना शर्मा यांच्या विरोधात दावा प्रलंबित आहे. तसेच या प्रकरणी 2 अज्ञान बालकांचा सुद्धा समावेश आहे.

संबंधित बातमी : 

महाराष्ट्रातील सर्वात मोठा गौप्यस्फोट, करुणासोबत परस्पर सहमतीने संबंधात दोन मुलं, धनंजय मुंडेंची कबुली

धनंजय मुंडे यांच्यावर आरोप करणारी रेणू शर्मा कोण?

संबंधित व्हिडीओ :