शेख हसीना यांचे विमान दिल्ली ऐवजी उत्तर प्रदेशातील हिंडन एअरबेसवर का उतरवण्यात आलं?

पंतप्रधानपदाचा राजीनामा दिल्यानंतर शेख हसीना यांना देश सोडून इतर देशात आश्रय घ्यावा लागला. सुरक्षेच्या कारणास्तव त्यांनी देश सोडला. बांगलादेशवरुन थेट विमान भारतात आलं आणि गाझियाबादमधील हिंडन एअरबेसवर उतरलं. शेख हसीना या काही काळ भारतातच राहणार असून त्यानंतर त्या लंडन किंवा इतर ठिकाणी कुठेतरी जाऊ शकतात, असे बोलले जात आहे. बांगलादेशातील शेख हसीना यांचे सरकार उलथून टाकल्यानंतर लष्कराने आता देशाचे सूत्र हाती घेतले आहे. लवकरच काळजीवाहू सरकार स्थापन केलं जाणार असल्याची माहिती लष्कर प्रमुखांनी दिली आहे. देशाची राजधानी दिल्लीतील IGI सारख्या VIP विमानतळाऐवजी शेख हसीना यांचे विमान गाझियाबादच्या हिंडन एअरबेसवर का उतरवण्यात आले असा प्रश्न अनेकांना पडला आहे.

आशियातील सर्वात मोठे एअरबेस

जेव्हा कोणत्याही देशाचे प्रमुख भारतात येतात तेव्हा त्यांना दिल्लीतील IGI विमानतळावर उतरवले जाते. तेथेच त्यांचे स्वागत केले जाते. मात्र यावेळी शेख हसीना यांच्यासोबत तसे झाले नाही. शेख हसीना यांचे विमान थेट उत्तर प्रदेशातील गाझियाबाद येथील हिंडन एअरबेसवर उतरवण्यात आले. सोशल मीडियावर लोकं याविषयी वेगवेगळे तर्कवितर्क लढवत आहेत. पण त्याची खरी कहाणी काही औरच आहे.

हिंडन एअरबेस हे आशियातील सर्वात मोठे एअरबेस आहे. ज्याच्यावर हवाई दलाचे नियंत्रण आहे. या एअरबेसवर भारताची अनेक विमाने आणि लढाऊ विमाने तैनात असतात. याशिवाय येथील सुरक्षा व्यवस्था सामान्य विमानतळांपेक्षा अधिक मजबूत असते. आता शेख हसीना ज्या परिस्थितीत भारतात आल्या आहेत त्यामुळे त्या सामान्य नाहीत. यामुळेच शेख हसीना यांचे विमान दिल्लीच्या व्यस्त IGI विमानतळाऐवजी हिंडन एअरबेसवर उतरवण्यात आलं.

शेख हसीना दिल्लीत उतरल्या असत्या तर काय झालं असतं?

शेख हसीना यांचे विमान कुठे उतरणार याची माहिती गुप्त ठेवण्यात आली होती. सुरक्षेच्या कारणास्तव शेख हसीना यांचे विमान कुठे उतरणार याची माहिती दिली गेली नव्हती. तज्ज्ञांच्या मते, शेख हसीना यांचे विमान दिल्लीत न उतरवता ते यूपीत एअर फोर्सच्या ताब्यात असलेल्या विमानतळावर उतरवण्यात आले. याचे कारण म्हणजे ही भारतीय गुप्तचर यंत्रणांची रणनीती असू शकते. दिल्लीचे IGI विमानतळ हे अतिशय व्यस्त विमानतळ आहे. येथे दररोज व्हीआयपी मुव्हमेंट असतात.

जर शेख हसीना यांचे विमान दिल्लीच्या आयजीआय विमानतळावर उतरले असते, तर तेथील सुरक्षा व्यवस्था सांभाळणे आमि हाताळणे यात अडचणी आल्या असत्या. त्यांना विमानतळावरून रस्त्याने सुरक्षित स्थळी नेणे अत्यंत आव्हानात्मक होते. त्यामुळेच तज्ज्ञांच्या मते त्यांचे विमान दिल्लीच्या IGI विमानतळावर नाही तर उत्तर प्रदेशातील गाझियाबाद येथील हिंडन एअरबेसवर उतरवण्यात आले.