खेळाडू अतिशहाणपणा करत होता, पंचानं सगळी उतरवली
असं म्हणतात की क्रिकेटमध्ये अतिशहानपणा चालत नाही. कोणी साधी हुशारी जरी केली तरी ते क्रिकेटच्या मैदानावरील कॅमेऱ्यात कैद होतं. त्याला शिक्षा देखील होते. असंच काहीसं इंग्लंडमध्ये घडलंय.
नवी दिल्ली : हुशारी केली की ती कधी ना कधी समोर येतेच. विशेष म्हणजे खेळात (Sports) कोणताही अतिशहानपणा चालत नाही. तो लगेच पकडलाही जातो. असे अनेक उदाहरणं आपण पाहिले देखील असतील. क्रिकेटच्या (Cricket) मैदानावरुन खासकरून असे प्रकार पहायला मिळतात. अनेकदा तर पंचाचं ऐकलं देखील जात नाही. अनेकदा पंचाच्या निर्णयाचा विरोधही केला जातो. हा प्रकार मोठ्या प्रमाणात होत असतो. पण, इंग्लंडच्या (England) मैदानावर थोडा वेगळाच प्रकार समोर आलाय. तो नेमका काय आहे, ते जाणून घेऊया…
इंग्लंडमध्ये नेमकं काय घडलं?
इंग्लंडमध्ये क्षेत्ररक्षकानं हुशारी दाखवली पंचानं थेट दंडच ठोठावल्याचं समोर आलंय. ट्रेंट ब्रिज येथे एकदिवसीय कप फायनल दरम्यान ही घटना घडली. जेतेपदाच्या लढतीत केंट आणि लँकेशायर आमनेसामने होते. प्रथम फलंदाजी करताना केंटने 50 षटकांत 306/6 धावा केल्या आणि लँकेशायरसमोर 307 धावांचे लक्ष्य ठेवलं होतं.
हातमोजे काढून फेकले
लँकेशायरनं फलंदाजीला सुरुवात केली. दुसऱ्या डावात अर्धा खेळ झाला. जवळपास 21वं षटक होतं. स्टीव्हन क्रॉफ्ट आणि कीटन जेनिंग्स क्रीजवर होते. दोन्ही फलंदाज वेगानं धावले. यष्टिरक्षक ऑली रॉबिन्सनही चेंडूच्या मागे धावला. पण, त्याने स्टंपसमोरचे हातमोजे काढून फेकले.
पाच पेनल्टी धावा
यष्टिरक्षकाने चेंडू स्टंपच्या दिशेनं फेकला. पण 27 वर्षीय क्षेत्ररक्षक हॅरी फिंचने यष्टीरक्षक ऑली रॉबिन्सनचे ग्लोव्हज उचलले आणि चेंडू रोखण्यासाठी क्षेत्ररक्षण केले. त्यामुळे लँकेशायरला पाच पेनल्टी धावा मिळाल्या.
नियम 28 चं उल्लंघन
नियम 28 चं उल्लंघन केल्यानं लँकेशायरला पाच धावांचा दंड देण्यात आला. मात्र, या चुकीचा फटका फिंच आणि केंटला बसला नाही आणि त्यांनी हा सामना 21 धावांनी जिंकून ट्रॉफी जिंकली. लँकेशायरचा डाव 48.4 षटकांत 285 धावांत आटोपला.
