गुगलसोबतच्या वादानंतर Paytmकडून स्वदेशी मिनी स्टोअर अॅप लाँच, युजर्सना मिळणार जबरदस्त फायदा
विशेष म्हणजे युजर्सला ही वेबसाइट डाऊनलोड न करताच ऍपसारखा अनुभव देते.
मुंबईः भारतीय पेमेंट अॅप असलेल्या पेटीएमनं ई-कॉमर्स क्षेत्रात चांगलाच दबदबा निर्माण केलेला आहे. जास्तीत जास्त युजर्सपर्यंत पोहोचण्यासाठी पेटीएमनं आता स्वतःचं अँड्रॉइड मिनी स्टोअर(Paytm Mini App Store) अॅप लाँच केलं आहे. पेटीएम मिनी स्टोअर अॅप हे ग्राहकांच्या गरजा लक्षात घेऊन तयार करण्यात आलं असून, ती एक मोबाइल वेबसाइट आहे. विशेष म्हणजे युजर्सला ही वेबसाइट डाऊनलोड न करताच अॅपसारखा अनुभव देते. या प्लॅटफॉर्ममुळे फक्त डेव्हलपर्सलाच फायदा होणार नाही, तर स्मार्टफोन युजर्सचा डेटा वाचणार असून, मेमरी सेव्ह करण्यासही मदत मिळणार आहे. (paytm launched mini app store )
पेटीएम कोणत्याही शुल्काशिवाय मिनी अॅप लिस्टिंगची सेवा देत आहे. पेमेंटसाठी डेव्हलपर्स युजर्सला पेटीएम वॉलेट, पेटीएम पेमेंट्स बँक, यूपीआय, नेट बँकिंग आणि कार्डद्वारे व्यवहार करण्यासाठी पर्याय देण्यास सक्षम आहे. कंपनी शून्य शुल्कावर पेटीएम वॉलेट, पेटीएम पेमेंट्स बँक अकाऊंट आणि यूपीआय सेवा देत आहे. तर क्रेडिट कार्डसारख्या इतर माध्यमातून फक्त 2 टक्के शुल्क वसूल करते. या ऍपचा उद्देश भारतातल्या डिजिटल युजर्सला सक्षम पर्याय उपलब्ध करून देऊन आत्मनिर्भर भारत मोहिमेला चालना देण्याचा आहे.
Decathlon, Ola, Park +, Rapido, Netmeds, 1MG, Domino’s Pizza, FreshMenu, NoBroker सारखे 300 हून अधिक ऍप अशी सेवा देत आहेत. आता यात पेटीएमचाही समावेश झाला आहे. सध्या ही अॅप वेबसाइट बिटावर सुरू असून, ठरावीक युजर्सला वापरता येत आहे. सप्टेंबरपर्यंत 12 मिलियनहून अधिक वेळा या ऍपला युजर्सनं भेट दिली आहे. पेटीएमचे संस्थापक आणि सीईओ विजय शेखर शर्मा यांनीसुद्धा पेटीएम मिनी स्टोअर अॅप लाँच केल्यानंतर आनंद व्यक्त केला आहे. विजय शेखर शर्मा म्हणतात, मला गर्व आहे की, आज आम्ही असं काही तरी लाँच करत आहोत, जे भारतीय अॅपडेव्हलपरसाठी एक नवीन संधी निर्माण करेल. पेटीएम मिनी स्टोअर ऍप आपल्याला तरुण भारतीय डेव्हलपर्सला नवनवीन मार्गे पेमेंटचा पर्याय उपलब्ध करून देणार आहे. पेटीएम युजर्ससाठी हा एक अद्वितीय अनुभव असेल, कारण हे ऍप डाऊनलोड करण्याची आवश्यकता नाही. तसेच युजर्सला पेमेंट अॅपमध्ये पर्याय उपलब्ध करून देण्यात सक्षम बनवत आहे.
गेल्या काही दिवसांपूर्वी पेटीएमचे अॅप्लिकेशन गुगल प्ले स्टोअरवरून हटवण्यात आले होते. त्यावेळी पेटीएमचे संस्थापक आणि सीईओ विजय शेखर शर्मा यांनी नाराजी व्यक्त केली होती. मात्र पेटीएमशी संबंधित इतर पेटीएम बिझनेस, पेटीएम मनी, पेटीएम मॉल हे अॅप प्ले स्टोअरवर अद्याप कायम आहेत.