मागील 24 तासांपासून गोसेखुर्द धरणाच्या पाणलोट क्षेत्रात होत असलेल्या सततच्या पावसामुळे नद्यांच्या पाणीपातळीत मोठी वाढ झाली आहे. गोंदिया जिल्ह्यातील पुजारीटोला आणि धापेवाडा बॅरेजमधून पाण्याचा विसर्ग सुरू असल्याने भंडारा जिल्ह्यातील गोसेखुर्द धरणातील पाण्याची आवक वाढली आहे. या पार्श्वभूमीवर भंडारा जिल्हा प्रशासनाने खबरदारी म्हणून गोसेखुर्द धरणाचे ११ दरवाजे अर्ध्या मीटरने उघडले आहेत. धरणातून सध्या ४९ हजार ४०५ क्युसेक वेगाने पाण्याचा विसर्ग नदीपात्रात सुरू करण्यात आला आहे.
