काही दिवसांवर येऊन ठेपलेल्या रक्षाबंधना निमित्त शहरातील बाजारपेठेत आकर्षक राख्या विक्रीस दाखल झाल्या आहेत. महिलांना या राख्या भुरळ घालत आहे. बहिण- भावाच्या पवित्र नात्याचे प्रतीक असलेला सण रक्षाबंधन शनिवार दिनांक ९ ऑगस्ट रोजी साजरा होणार आहे. महागाईमुळे दरांमध्ये सुमारे २० टक्क्यांनी वाढ झाल्याचेही व्यावसायिकांकडून सांगितले जात आहे.बाजारपेठेत विविध प्रकारच्या आकर्षक राख्यासह पारंपारिक गोंडा राखी (देव राखी) बाजारात विक्रीस दाखल झाली आहे. महिलांकडून राख्यांच्या दुकानात खरेदीसाठी गर्दी केली जात आहे. शहराच्या विविध भागांमध्ये लहान- मोठ्या राखी विक्रीचे दुकाने सजल्याचे दिसत आहे. परदेश तसेच शहराबाहेर कामानिमित्त असलेल्या भाऊरायांना वेळेत राखी पोचण्यासाठी आत्तापासूनच राखी खरेदी करण्याकडे महिलांचा कल वाढला आहे. चांगल्यात चांगली आणि आकर्षक राखी खरेदीस महिलांकडून पसंती दिली जात आहे. दुसरीकडे व्यवसायिकांमध्येही उत्साहाचे वातावरण आहे. आतापासूनच किरकोळ विक्रेते आणि सामान्य नागरिकांकडून खरेदीसाठी गर्दी केली जात आहे. सुमारे ५० टक्क्याने ग्राहक वाढले असल्याची यादरम्यान माहिती व्यवसायिकांकडून देण्यात आली आहे. कुंदन वर्क आणि साध्या राख्यांना जास्त मागणी आहे.यासोबतच चिमुकल्यांसाठी अर्थातच बालगोपालांसाठी लायटिंग राख्या,छोटा भीम, डोरेमॉन, मोटू पतलू, श्री गणेशा, श्रीकृष्ण अशा राख्या बाजारात विक्रीस आल्या आहे. लायटिंग, लाकडी, पपेट, कडा राखीसह पारंपारिक देव राखी अशा विविध प्रकारच्या राख्या बाजारात विक्रीस उपलब्ध आहे. तसेच राखींमधील नावीन्यता लक्षात घेता,या वर्षी लायटिंग राखीमध्ये स्पिनर लायटिंग राखी आणि कपल राखी अर्थात महिला पुरुष दोघांसाठीही असलेली राख्या बाजारात आल्या आहेत. स्पिनर राखीस असलेले बटन दाबले की विविध रंगीत लायटिंग राखीची आकर्षकता वाढवते. तर कपल राखीमध्ये दोन राख्यांपैकी महिलांना सिंगल दोऱ्याची अर्थात बांगड्यांना बांधता येईल अशी लट राखी आणि तशीच बनावट असलेली डबल दोऱ्याची पुरुषांसाठी राखी यंदाचे नावीन्य आहे.
