जळगाव जिल्ह्याचे पालकमंत्री गुलाबराव पाटील यांच्या प्रयत्नातून यावल एकात्मिक आदिवासी विकास प्रकल्प अंतर्गत एरंडोल येथे उपकार्यालय सुरू करण्यास राज्यस्तरीय बैठकीत मान्यता देण्यात आली आहे. उपकार्यालय मंजूर झाल्याच्या घोषणेनंतर आदिवासी टायगर सेनेच्या पदाधिकाऱ्यांनी पाळधी येथे पालकमंत्री गुलाबराव पाटील यांच्या निवासस्थानापर्यंत जल्लोषात मिरवणूक काढली. यावेळी गुलाबराव पाटील यांनी आदिवासी बांधवांसोबत ढोल-ताशांच्या गजरात ठेका धरत आनंद व्यक्त केला. एरंडोल येथे उपकार्यालय सुरू करण्यास मान्यतेच्या निर्णयामुळे चाळीसगाव, भडगाव, पाचोरा, पारोळा, अमळनेर व धरणगावसह सात तालुक्यांतील आदिवासी बांधवांना योजनांचा लाभ सुलभ होणार आहे. सुमारे 13 हजार विद्यार्थ्यांना आश्रमशाळा, वसतिगृह व शिष्यवृत्ती योजनांचा थेट फायदा मिळणार आहे.
