जळगावच्या चाळीसगाव तालुक्यात यंदा दुष्काळाचा फटका आता जनावरांनाही बसू लागला आहे. गेल्या काही महिन्यांपासून पावसाने पाठ फिरवल्याने शेतातील चारा वाळून गेला असून जनावरांसाठी चाऱ्याची व्यवस्था करताना शेतकऱ्यांची मोठी धावपळ होत आहे. एकीकडे पाण्याची टंचाई, तर दुसरीकडे चाऱ्याचा प्रश्न अशा दुहेरी संकटात शेतकरी सापडले आहेत. शेतीच्या उत्पन्नावर परिणाम झालेला असतानाच जनावरांचा सांभाळ करण्यासाठीही शेतकऱ्यांना आर्थिक अडचणींचा सामना करावा लागत आहे. त्यामुळे दुष्काळाची झळ आता केवळ शेतीपुरती मर्यादित न राहता पशुधनालाही बसत असल्याचे चित्र चाळीसगाव तालुक्यात पाहायला मिळत आहे.
