जळगावच्या चाळीसगाव कृषी उत्पन्न बाजार समिती येथे लाल कांद्याची विक्रमी आवक होत असून एकाच दिवसात सुमारे ४१३ वाहनांमधून तब्बल ९ हजार क्विंटल कांदा बाजारात दाखल झाला. आवक अचानक वाढल्याने कांद्याचे दर कोसळले असून सरासरी भाव ९०० रुपये प्रति क्विंटलपर्यंत खाली आला आहे. गेल्या आठवड्यात सुमारे ४ हजार क्विंटल आवक असताना कांद्याला सरासरी १२०० रुपये भाव मिळत होता. मात्र आठवडाभरातच आवक दुपटीने वाढल्याने दरात सुमारे ४०० रुपयांची घसरण झाली आहे. यंदा चांगल्या पावसामुळे तालुक्यात कांद्याचे बंपर उत्पादन झाले आहे. लाल कांद्याची साठवणूक क्षमता कमी असल्याने शेतकरी तातडीने विक्रीसाठी बाजारात आणत आहेत. पुरवठा वाढला आणि मागणी मर्यादित राहिल्यास आगामी काळात दर आणखी कोसळण्याची भीती व्यक्त होत असून, उत्पादन खर्चही निघत नसल्याने शेतकरी हवालदिल झाला आहे.
