पावसाळ्यात धबधबे आणि निसर्गसौंदर्याचा आनंद घेण्यासाठी हजारो पर्यटक माळशेज घाटाकडे धाव घेतात. मात्र, याच घाटातून आता एक धक्कादायक व्हिडिओ समोर आला आहे. घाटातील एका वळणावर सोसाट्याच्या वाऱ्याचा वेग इतका प्रचंड आहे की, चालत्या दुचाकी अक्षरशः रस्त्यावर कोसळताना दिसत आहेत. व्हायरल होत असलेल्या या व्हिडिओमध्ये माळशेज घाटातील बोगद्याजवळील धोकादायक वळण स्पष्टपणे दिसत आहे. या ठिकाणी वाऱ्याचा वेग इतका प्रचंड आहे की, दुचाकीस्वारांना वाहनावर नियंत्रण ठेवणे अशक्य होत आहे.
