होळीच्या मंगलमय वातावरणात श्री क्षेत्र आळंदी येथील श्री संत ज्ञानेश्वर महाराज संजीवन समाधी मंदिरात यंदा आकर्षक सूर्यफुलांच्या पुष्पसजावटीने भक्तांचे लक्ष वेधून घेतले. रंगोत्सवाच्या पार्श्वभूमीवर साकारलेली ही अनोखी सजावट भाविकांसाठी विशेष आकर्षण ठरली. मंदिर परिसरात हजारो सूर्यफुलांच्या आरासीतून समाधी मंदिराचा गाभारा उजळून निघाला होता. पिवळ्या झगमगत्या सूर्यफुलांनी संपूर्ण परिसरात प्रसन्नता आणि चैतन्य निर्माण केले होते. पारंपरिक फुलांसोबतच सूर्यफुलांचा वापर करून केलेली ही सजावट निसर्ग आणि भक्तीभाव यांचा सुंदर मिलाफ असल्याची भावना भाविकांनी व्यक्त केली.होळीच्या निमित्ताने सकाळपासूनच अभिषेक, कीर्तन आणि हरिनाम संकीर्तनाचे कार्यक्रम आयोजित करण्यात आले होते. दर्शनासाठी राज्याच्या विविध भागांतून आलेल्या भाविकांनी मोठी गर्दी केली होती. मंदिर प्रशासनाने दर्शनरांगांची योग्य व्यवस्था केल्याने भाविकांना सुलभ दर्शन घेता आले. सूर्यफुलांच्या या देखण्या आरासीतून ज्ञानेश्वर माऊलींच्या समाधीस्थळाला एक वेगळेच तेज प्राप्त झाले असून, होळीचा उत्सव भक्तीमय वातावरणात साजरा झाला.
