शौर्य दिनानिमित्त कोरेगाव-भीमामध्ये जनसागर लोटला, सुरक्षेसाठी 250 व्हॉट्सअप ग्रुप अॅडमिनला नोटीस

भीमा कोरेगाव

पुणे : कोरेगाव-भीमा (Bhima Koregaon) इथे आज 1 जानेवारी शौर्य दिनानिमित्ताने विजयस्तंभ अभिवादन कार्यक्रम होत आहे. या कार्यक्रमासाठी  अनुयायांचा जनसागर लोटला असून पोलिसांचा मोठा फौजफाटा तैनात करण्यात आला आहे. राज्याचे उपमुख्यमंत्री अजित पवार यांनी कोरेगाव भीमा इथे सकाळीच दाखल होत विजयस्तंभाला अभिवादन केलं. कोणत्याही अफवांवर विश्वास ठेऊ नका असं आवाहनही त्यांनी केलं. (Bhima Koregaon)

कोरेगाव भीमा इथल्या विजयस्तंभास प्रकाश आंबेडकर यांनीदेखील अभिवादन करत मानवंदना दिली. अनेक मोठे नेतेही आज अभिवादनासाठी याठिकाणी जाणार आहेत.

भीमा कोरेगावमध्ये कडेकोट बंदोबस्त

भीमा कोरेगाव इथे 2018 मध्ये झालेल्या दंगलीच्या पार्श्वभूमीवर कडक पोलीस बंदोबस्त तैनात करण्यात आला आहे. एकूण 10 हजार पोलीस बंदोबस्तासाठी तैनात आहेत. 250 व्हॉट्सअप ग्रुप अॅडमिनला नोटीस बजावण्यात आल्या आहेत. दीडशे एकरवरवर पार्किंगची व्यवस्था करण्यात आली आहे. 2018 च्या दंगलीत सहभागी लोकांना जिल्हाबंदी करण्यात आली आहे, अशी माहिती पुणे ग्रामीण पोलीस अधीक्षक संदीप पाटील यांनी दिली.