किरण रावला आई होण्यासाठी करावा लागला खूप संघर्ष, अनेकवेळा झाला गर्भपात
आमीर खानची दुसरी पत्नी किरण राव हिने तिला आई होण्यासाठी किती संघर्ष करावा लागला याबाबत नुकताच खुलासा केला आहे. प्रत्येक स्त्रीला आई होण्याची इच्छा असते. तशी किरण रावला देखील होती. पण सतत गर्भपात झाल्याने तिला अनेक वेदना सहन कराव्या लागल्याचं तिने म्हटले आहे.
मुंबई : आमिर खान आणि त्याची दुसरी पत्नी किरण राव वेगळे होऊन बराच काळ लोटला आहे. किरण राव तिच्या प्रोफेशनल लाइफसोबतच तिच्या पर्सनल लाईफबाबतही चर्चेत असते. नुकताच ‘लापता लेडीज’ या चित्रपटाच्या दिग्दर्शकाच्या भूमिकेत वाहवा मिळवलेल्या किरणने एक मोठा खुलासा केला आहे. तिने सांगितले की, मुलगा आझाद खानच्या जन्मापूर्वी तिला अनेकवेळा गर्भपाताच्या वेदना सहन कराव्या लागल्या आहेत.
आई होण्यासाठी केला संघर्ष
किरण रावला आई होण्यासाठी खूप संघर्ष करावा लागला आहे. लग्नानंतर प्रत्येक स्त्रीला आई होण्याची इच्छा असते. सुपरस्टार आमिर खानसोबत लग्नानंतर किरण रावनेही हे स्वप्न पाहिले होते. मात्र यासाठी तिला अनेक चढउतारांचा सामना करावा लागला. अलीकडेच झूमला दिलेल्या मुलाखतीत किरण रावने आई होण्यासाठी किती त्रास सहन करावा लागला हे सांगितले आहे.
डायरेक्टर किरण राव म्हणाली की, आम्ही धोबीघाट चित्रपटाची तयारी करत होतो, तेव्हा मुलगा आझाद खानचा जन्म झाला. आम्ही सरोगसीची मदत घेतली, त्यामुळे आमिर आणि मी पालक होऊ शकलो. याचे मुख्य कारण म्हणजे माझे अनेक गर्भपात झाले होते आणि मी पुन्हा पुन्हा गर्भधारणा करू शकत नव्हते.
आरोग्यावर मोठा परिणाम
माझ्या शारीरिक आणि मानसिक आरोग्यावर याचा खूप परिणाम झाला. मी 5 वर्षे खूप वेदना सहन केल्या आणि खूप अडचणींनंतर मला आई होण्याचा आनंद मिळाला मग तो सरोगसीच्या मदतीने का होईना.
2011 मध्ये किरण राव आणि आमिर खान यांचा मुलगा आझाद खानचा जन्म झाला. घटस्फोटानंतरही आमिर अनेकदा त्याच्या मुलासोबत स्पॉट झाला आहे. एवढेच नाही तर आमिरची मोठी मुलगी आयरा खानच्या लग्नात किरण आणि आझाद दिसले होते.