पुणे : अनधिकृत बांधकाम प्रकरणी पुणे न्यायालयाने काँग्रेसचे नगरसेवक अविनाश बागवे यांचं नगरसेवक पद रद्द केलंय. या प्रकरणी मनसेचे उमेदवार भूपेंद्र शेंडगे यांनी बागवे यांच्याविरोधात दावा दाखल केला होता. त्यावर निकाल देताना पुणे कोर्टाने बागवे यांचं नगरसेवक पद रद्द करण्याचा निर्णय दिलाय. दरम्यान, नगरसेवक अविनाश बागवे या निकालाविरोधात 17 जुलैला हायकोर्टात आव्हान देणार असल्याचं त्यांनी म्हटलंय (Pune court disqualify Avinash Bagwe as corporator).
अविनाश बागवे हे माजी गृहराज्यमंत्री आणि काँग्रेसचे पुणे शहर काँग्रेस कमिटीचे अध्यक्ष रमेश बागवे यांचे चिरंजीव आहेत. ते पुणे महानगरपालिकेच्या 2017 च्या निवडणुकीत प्रभाग क्रमांक 19 अ मधून निवडून आले होते. 4 फेब्रुवारी 2017 रोजी मनसेचे उमेदवार भूपेंद्र शेंडगे यांनी उमेदवारी अर्जाची छाननी करताना त्यात विसंगत आणि खोटी माहिती दिल्याची तक्रार केली. मात्र, यावर कोर्टाचा आदेश नसल्याचं सांगत निवडणूक अधिकाऱ्यांनी ही तक्रार फेटाळली. त्यानंतर अविनाश बागवे निवडणुकीत विजयी झाले.
दरम्यान, पुण्यातील स्थानिक न्यायालयाने दिलेल्या निकालाला अविनाश बागवे उच्च न्यायालयात आव्हान देणार आहेत. बागवे यांना उच्च न्यायालयात निकाल बदलेल असा विश्वास आहे.