Birthday special : भुवनेश्वर कुमार-सचिनला शून्यावर बाद करणारा 'स्विंग इज किंग'

टीम इंडियाचा स्विंग किंग भुवनेश्वर कुमार आज 29 वा वाढदिवस साजरा करत आहे. डेथ ओव्हरचा बादशाह म्हणून भुवीने दबदबा निर्माण केला आहे. 5 फेब्रुवारी 1990 रोजी जन्मलेला भुवनेश्वर टीम इंडियाचा आधारस्तंभ बनला आहे. भुवनेश्वर सध्या टीम इंडियासोबत न्यूझीलंड दौऱ्यावर आहे. बुधवारपासून भारत विरुद्ध न्यूझीलंड यांच्यात टी 20 मालिका सुरु होत आहे. त्याच्या तयारीत भुवनेश्वर आहे.

भुवनेश्वरने आंतरराष्ट्रीय क्रिकेटमध्ये दबदबा निर्माण केला असला, तरी आंतरराष्ट्रीय पदार्पणापूर्वीच भुवीने मोठी कामगिरी केली होती. प्रथम श्रेणी क्रिकेटमध्ये मास्टर ब्लास्टर सचिन तेंडुलकरला भुवनेश्वरने शून्यावर बाद केलं होतं. रणजी चषकाच्या फायनलमध्ये 12 जानेवारी 2009 रोजी भुवीने सचिनला आल्या पावली माघारी धाडलं होतं.

भुवनेश्वरने फेब्रुवारी 2013 मध्ये ऑस्ट्रेलियाविरुद्धच्या चेन्नई कसोटीतून भारतीय संघात पदार्पण केलं होतं. भुवनेश्वर भारतासाठी लकी ठरला. कारण तो येताच भारतीय संघाने सलग सहा कसोटी सामने जिंकण्याचा पराक्रम गाजवला.

भुवनेश्वच्या पदार्पणासह भारताने ऑस्ट्रेलियाविरुद्धची 4 सामन्यांची कसोटी मालिका आणि वेस्ट इंडिज विरुद्धचे 2 कसोटी सामने जिंकले होते. मात्र त्यावेळी भुवनेश्वरला लक्षवेधी कामगिरी करता आली नव्हती. त्याने 9 विकेट घेतल्या होत्या. मात्र त्यानंतर 2014 मधील इंग्लंड दौऱ्यात भुवीने जबरदस्त कामगिरी केली होती. त्यावेळी भुवनेश्वरने 19 विकेट्स घेतल्या होत्याच, शिवाय 3 अर्धशतकंही ठोकली होती.

त्यापूर्वी भुवनेश्वरने पाकिस्तानविरुद्ध डिसेंबर 2012 मध्ये टी ट्वेण्टी आणि वन डे सामन्यात धडाकेबाज पदार्पण केलं होतं. बंगळुरु इथं पाकिस्तानविरुद्धच्या टी 20 सामन्यात पदार्पण करताना पहिल्याच ओव्हरमध्ये विकेट घेतली होती.

त्यावेळी भुवनेश्वरने भारतीय गोलंदाजीची सुरुवात करताना पाकिस्तानी फलंदाज नासिर जमशेदला (2) क्लीन बोल्ड केलं होतं. त्या सामन्यात भुवनेश्वरने 4-0-9-3 अशी जबरदस्त कामगिरी केली होती.

त्यानंतर भुवनेश्वरने पाकिस्तानविरुद्धच्या चेन्नईतील सामन्यातून वन डेमध्ये पदार्पण केलं. वन डे सामन्यातील पदार्पणाच्या पहिल्याच चेंडूवर त्याने विकेट घेतली होती. मोहम्मद हाफीजला त्याने तंबूत धाडलं होतं. त्या सामन्यात त्याने 9-3-27-2 असा धमाका केला होता.

भुवनेश्वरने आतापर्यंत 21 आंतरराष्ट्रीय कसोटी सामने खेळल्या आहे. त्यामध्ये त्याने 63 विकेट्स घेतल्या. तर 103 वन डेत 114 आणि 34 टी ट्वेण्टी सामन्यात 33 विकेट्स भुवनेश्वरच्या नावावर आहेत.

Choose your language

Birthday special : भुवनेश्वर कुमार-सचिनला शून्यावर बाद करणारा ‘स्विंग इज किंग’

Network