PHOTO: नाशिकमध्ये पोलीस आयुक्तांचे शस्त्रपूजन
नाशिकमध्ये दसऱ्याचे निमित्त साधून शुक्रवारी पोलीस आयुक्त दीपक पांडेय यांनी आयुक्तालयातील शस्त्रागारात शस्त्रपूजन केले.
नाशिकमध्ये विजयादशमी अर्थातच दसऱ्याचा मुहूर्त साधून पोलीस आयुक्त दीपक पांडेय यांनी शुक्रवार पोलीस आयुक्तालयातील शस्त्रागारात शस्त्रपूजन केले. यावेळी पोलीस कर्मचाऱ्यांची मोठ्या संख्येने उपस्थिती होती.
नाशिकमध्ये गेल्या काही दिवसांपासून गुन्हेगारी घटनांमध्ये वाढ झाली आहे. या घटना रोखण्यासाठी आणि गुन्हेगारांच्या नाड्या चोहोबाजूंनी आवळण्यासाठी पोलीस आधुनिक अशा शस्त्रांनी सज्ज झालेले दिसत आहेत.
नाशिक पोलिस आयुक्तालयातील शस्त्रागारात अनेक आधुनिक शस्त्रेही आहेत. काळासोबत कात टाकत पोलिसांनी गुन्हेगारांवर मात करण्यासाठी ही शस्त्रे तयार ठेवल्याचे पोलीस आयुक्तांनी यावेळी सांगितले.
पोलीस आयुक्त दीपक पांडेय यांनी यावेळी शस्त्रागारातील शस्त्रांचे पूजन आणि आरती केली. तसेच ही शस्त्रे वापरण्याची वेळच आमच्या दलावर येऊन नये, असा शुभ संकल्पही या दसऱ्यानिमित्त आयोजित शस्त्र पूजनावेळी सोडला.
नाशिक पोलिसांनी गेल्या काही दिवसांपासून धडाकेबाज कारवाई सुरू केली आहे. मग तो बनावट दारूचा कारखाना उद्धवस्त करणे असो की, भूमाफियांना घातलेल्या बेड्या. या शस्त्रांच्या बळावर त्यांचे काम असेच सुरू राहील.
नाशिक पोलीस दक्ष आहेत. आधुनिक अशा शस्त्रास्त्रांनी सज्ज आहेत. डोळ्यात तेल घालून त्यांचा जागता पहारा असतो. त्यामुळेच नाशिककर कसलेही संकट येऊ द्या, त्यावेळी निर्धास्त आपल्या घरात राहू शकतात.