अहमदाबाद : विशेष तपास पथकाने (एसआयटी) बुधवारी तीस्ता सेटलवाड (Teesta Setalwad), निवृत्त पोलीस महासंचालक आरबी श्रीकुमार आणि माजी आयपीएस अधिकारी संजीव भट्ट यांच्याविरुद्ध आरोपपत्र (Charge sheet) दाखल केले. 2002 च्या गुजरात दंगलीप्रकरणी पुरावे तयार केल्याप्रकरणी अहमदाबाद न्यायालयात (Ahmedabad Court) आरोपपत्र दाखल केले आहेत. मुख्य महानगर दंडाधिकारी न्यायालयात आरोपपत्र दाखल करण्यात आल्याचे तपास अधिकारी आणि सहायक पोलीस आयुक्त बी.व्ही.सोळंकी यांनी सांगितले.
माजी आयपीएस अधिकारी वकिल राहुल शर्मा यांनाही या प्रकरणात साक्षीदार करण्यात आल्याचे त्यांनी सांगितले. आरोपपत्रात एसआयटीने तीस्ता सेटलवाड यांच्यावर अनेक गंभीर आरोप केले असून या आरोपांना पुष्टी देण्यासाठी एसआयटीने न्यायालयात पुरावेही सादर केले आहेत.
आरोपपत्रानुसार, तीस्ता सेटलवाड यांनी 2002 च्या गुजरात दंगलीत तत्कालीन गुजरातचे मुख्यमंत्री असलेले पंतप्रधान नरेंद्र मोदी यांना गुंतवण्यासाठी पुरावे, बनावट कागदपत्रे तयार केली होती. या कटात दोन माजी आयपीएस अधिकारी आरबी श्रीकुमार आणि संजीव भट्ट यांचाही सहभाग होता, असे एसआयटीने म्हटले आहे.
तीस्ता आणि संजीव भट्ट एकमेकांच्या संपर्कात असल्याचा आरोप एसआयटीने केला आहे. संजीव भट्ट हे प्रमुख पत्रकार, स्वयंसेवी संस्था आणि गुजरात विधानसभेतील विरोधी पक्षनेते यांच्याशी ईमेलद्वारे संपर्कात होते.
संजीव भट्ट यांनी या सर्व आरोपींना अॅमिकस क्युरी आणि इतरांवर प्रभाव टाकण्यासाठी भडकवले होते आणि स्वतंत्र याचिका दाखल केल्या होत्या. आरोपींवर भारतीय दंड संहिता कलम 468, कलम 194 आणि कलम 218 या कलमांसह इतर तरतुदींखाली आरोप निश्चित केले आहेत.
जूनच्या शेवटच्या आठवड्यात अटक करण्यात आलेल्या सेटलवाड यांची सर्वोच्च न्यायालयाच्या 2 सप्टेंबरच्या आदेशानंतर अंतरिम जामिनावर सुटका करण्यात आली. या प्रकरणात श्रीकुमार आणि संजीव भट्ट हे दोघे कारागृहात आहेत.