बाबा, तुम्ही आई आणि धाकट्या बहिणीला का मारलंत? 89 वर्षीय निवृत्त लष्करी जवानाने घडाघडा कारणं सांगितली
शेर-ए-पंजाब कॉलनीतील प्रेम संदेश सोसायटीत राहणाऱ्या गंधोक यांच्या फ्लॅटमध्ये सोमवारी सकाळी पोलीस शिरले, तेव्हा आरोपी पुरुषोत्तम सिंग गंधोक अत्यंत शांतपणे बसलेला दिसला, बेडरुममध्ये रक्ताने माखलेल्या बेडवर त्यांची मुलगी आणि पत्नी यांचे मृतदेह आढळले.
मुंबई : मुंबईतील 89 वर्षीय निवृत्त लष्करी जवानाने (Ex Army Man) आपल्या पत्नी आणि मुलीची गळा चिरुन हत्या केली. रविवारी संध्याकाळी अंधेरी (पूर्व) भागातील अंधेरीतील शेर ए पंजाब कॉलनीत (Andheri Double Murder) हे हत्याकांड घडले. वृद्धाने अंथरुणाला खिळलेली 81 वर्षीय पत्नी आणि 55 वर्षीय गतिमंद मुलीचा गळा राहत्या घरात चिरला. हत्येच्या दुसऱ्या दिवशी मोठ्या मुलीला फोन करुन त्याने या घटनेचीही माहिती दिली. त्यानंतर सोमवारी सकाळी आरोपीने मेघवाडी पोलिसांसमोर आत्मसमर्पण (Mumbai Crime) केले. आरोपी पुरुषोत्तम सिंग गंधोक याने पोलिसांना सांगितले की, त्याने आपली पत्नी आणि मुलीची काळजी घेताना गेली 10 वर्षे अत्यंत क्लेश सहन केले आहेत, त्या दोघीही अंथरुणाला खिळल्या होत्या आणि त्यांना होणारा त्रास यापुढे त्याला बघायचा नव्हता.
शेर-ए-पंजाब कॉलनीतील प्रेम संदेश सोसायटीत राहणाऱ्या गंधोक यांच्या फ्लॅटमध्ये सोमवारी सकाळी पोलीस शिरले, तेव्हा आरोपी पुरुषोत्तम सिंग गंधोक अत्यंत शांतपणे बसलेला दिसला, बेडरुममध्ये रक्ताने माखलेल्या बेडवर त्यांची मुलगी आणि पत्नी यांचे मृतदेह आढळले.
काय आहे प्रकरण?
रविवारी रात्री 8.30 वाजताच्या सुमारास त्याने पत्नी जसबीर कौर आणि मुलगी कमलजीत कौर यांची हत्या केली. त्यानंतर जवळपास 12 तासांहून अधिक काळ लोटल्यानंतर गंधोकने सोमवारी सकाळी 8.40 वाजताच्या सुमारास त्यांची मोठी मुलगी गुरबिंदर कौर (58 वर्ष) हिला फोन करुन हत्यांची माहिती दिली.
किचनमधील चाकूने गळे चिरले
“गंधोक हा लष्करातील माजी सैनिक आहे. त्याने आपल्या पत्नी आणि मुलीचे गळे कापण्यासाठी स्वयंपाकघरातील चाकू वापरला. पत्नी आणि मुलीची काळजी घेण्यास, त्यांच्या दैनंदिन गरजा भागवण्यास तो असमर्थ होता, तो त्यांच्या वेदना आणखी पाहू शकत नव्हता, म्हणून त्याने हा गुन्हा केल्याचे सांगितले” अशी माहिती डीसीपी (झोन एक्स) महेश्वर रेड्डी यांनी दिली.
मोठी मुलगी-जावई घटनास्थळी
शेर-ए-पंजाब कॉलनीतच राहणारी त्याची मोठी मुलगी गुरबिंदर कौरने पोलिसांना सांगितले की, ती तिचे पती आणि मुलांसह आई-वडील आणि बहीण राहत असलेल्या फ्लॅटबाहेर पोहोचली, पण वडील आतून बंद असलेला दरवाजा उघडायला तयार नव्हते. मी आरडाओरडा केला, पण थोडा वेळ कोणीही प्रतिसाद दिला नाही. नंतर माझ्या वडिलांनी आम्हाला पोलिसांना बोलवायला सांगितले आणि फक्त त्यांच्यासाठीच दार उघडणार असल्याचे सांगितले.
त्यानंतर गुरबिंदर कौर आणि त्यांचे पती मेघवाडी पोलिस ठाण्यात गेले आणि पोलिसांना घेऊन परतले. मेघवाडी पोलिसांनी सांगितले की, गंधोकने दरवाजा उघडला आणि बेडरुममध्ये प्रवेश केले असता, त्यांना गंधोकच्या मुलीचा मृतदेह लाकडी पलंगावर, तर पत्नीचा मृतदेह लोखंडी पलंगावर रक्ताने माखलेल्या अवस्थेत आढळला.
हत्यांचं कारण काय?
आरोपी गंधोक खोलीत शांत बसला होता. गुरबिंदर कौरने तिच्या वडिलांना हत्या करण्याचे कारण विचारले. त्यावर त्याने उत्तर दिले, की तो बायको-मुलीच्या प्रदीर्घ आजारांना आणखी काळ झेलू शकत नव्हता, आणि त्यांना वेदना होताना पाहू शकत नव्हता. म्हणून रात्री 8.30 वाजता त्या झोपल्यानंतर त्याने दोघींची हत्या केली,” असे मेघवाडी पोलिसातील वरिष्ठ निरीक्षक रवींद्र कुडूपकर यांनी सांगितले. गंधोक याच्यावर खुनाचा गुन्हा दाखल करण्यात आला आहे.
संबंधित बातम्या :