संतापजनक ! बलात्कार पीडितेची गावकऱ्यांनी आख्ख्या गावात धींड काढली

प्रातिनिधिक फोटो

भोपाळ : मध्य प्रदेशच्या आदिवासी पट्ट्यातील अलीराजपूर जिल्ह्यात एक संतापजनक प्रकार समोर आला आहे. अलीराजपूरच्या जोबाट पोलीस ठाणे हद्दीत एका अल्पवयीन मुलीवर गावातीलच एका तरुणाने बलात्कार केला. याबाबतची माहिती समोर आल्यानंतर पीडितेच्या कुटुंबियांनी संबंधित आरोपीबाबत पोलिसात तक्रार न करता त्याची आणि पीडितेची गावात धींड काढल्याचा संतापजनक प्रकार समोर आला आहे (rape victim tied up with accused then procession taken out in village in Madhya Pradesh).

पीडितेला रस्सीने बांधून गावात धींड काढली

याप्रकरणी पीडितेने पोलिसात तक्रार केली आहे. पीडितेच्या तक्रारीनंतर पोलिसांनी याप्रकरणी गुन्हा दाखल केला आहे. संबंधित घटना ही रविवारी (28 मार्च) घडली. गावकऱ्यांनी पीडितेला आणि आरोपीला रस्सीने बांधून गावात त्यांची धींड काढली. विशेष म्हणजे आरोपीने मुलीवर बलात्कार केल्याची माहिती समोर आल्यानंतर पीडितेच्या नातेवाईकांनी आरोपीला न पकडता पीडितेला मारहाण केली.

पोलिसांची घटनास्थळी धाव

पीडितेच्या नातेवाईकांनी आणि कुटुबियांनी आरोपी आणि पीडितेला रस्सीने बांधून गावात धींड काढली. अनेकांनी या घटनेचा व्हिडीओ बनवला. अनेकांनी या घटनेचे व्हिडीओ सोशल मीडियावर व्हायरल केले. या घटनेचा सूगावा पोलिसांना लागला. त्यांनी तातडीने घटनास्थळी धाव घेतली. यावेळी पोलिसांनी पीडितेचा जबाब नोंदवला. त्या जबाबाच्या आधारावर पोलिसांनी एफआयआर दाखल केला. पोलिसांनी आधी बलात्कार करणाऱ्या आरोपी विरोधात एफआरआय दाखल केलाय. तर दुसरा एफआरआय तिला छळणाऱ्या गावकऱ्यांविरोधात दाखल केला आहे.

आरोपींना बेड्या

या घटनेबाबत जोबटचे पोलीस अधिकारी दिलीप सिंह यांनी प्रतिक्रिया दिली. संबंधित घटनेतील आरोपींना पोलिसांनी अटक केली आहे. या प्रकरणाचा पुढील तपास सुरु असल्याची माहिती त्यांनी दिली (rape victim tied up with accused then procession taken out in village in Madhya Pradesh).