‘83’मधून कपिल देव यांच्या मुलीची बॉलिवूडमध्ये एन्ट्री

मुंबई : अभिनेता रणवीर सिंगच्या ‘गल्ली बॉय’ या सिनेमाने बॉक्स ऑफिसवर धुमाकूळ घातला. त्यानंतर आता रणवीर बॉक्स ऑफिसला क्लीन बोल्ड करण्याच्या तयारीत आहे. रणवीर त्याच्या आगामी ‘83’ सिनेमात भारताला क्रिकेटमध्ये पहिला वर्ल्ड कप मिळवून देणाऱ्या माजी कर्णधार कपिल देव यांची भूमिका साकारणार आहे. या सिनेमाबाबत आता आणखी एक महत्त्वाची बातमी समोर आली आहे. या सिनेमातून कपिल देव यांची मुलगी बॉलिवूडमध्ये पदार्पण करणार आहे.

या सिनेमाबाबत अनेक बातम्या समोर येत होत्या. त्यातच आता कपिल देव यांची मुलगी आमिया देव या सिनेमातून बॉलिवूडमध्ये पाऊल टाकणार असल्याची माहिती आहे. पण, आमिया ही अभिनेत्री म्हणून नाही, तर असिस्टंट डायरेक्टर म्हणून या सिनेमात काम करणार आहे.

क्रिकेटर संदीप पाटील यांचा मुलगा चिराग पाटीलने याबाबतची माहिती दिली. चिराग हा ‘83’ या सिनेमात पिता संदीप यांची भूमिका साकारणार आहे. त्यासाठी तो खूप मेहनत घेतो आहे. या सिनेमासाठी तो खूप उत्साहित असल्याचं त्याने सांगितलं.

या सिनेमामध्ये कपिल देव यांची भूमिका साकारण्यासाठी रणवीर अनेक दिवसांपासून तयारी करत आहे. तो क्रिकेट शिकत आहे आणि यासाठी त्याला खुद्द कपिल देव हे प्रशिक्षण देत आहेत. त्यामुळे रणवीरला कपिल यांच्या सानिध्यात राहून त्यांचं व्यक्तिमत्त्व आपल्या भूमिकेत उतरवण्यात मदत होणार आहे. लवकरच या सिनेमाचं शुटिंग सुरु होणार आहे.

या सिनेमामध्ये रणवीर सिंगसोबत चिराग पाटील, साकीब सलीम, पंकज त्रिपाठी, हार्डी संधू हे मुख्य भूमिकेत दिसतील. या सिनेमाचं दिग्दर्शन कबीर खान करत आहेत.