बाळासाहेब ठाकरे ट्रॉमा हॉस्पिटलमध्ये नर्सची ड्युटी, बॉलिवूड अभिनेत्री कोरोना पॉझिटिव्ह

मुंबई : कोरोनाग्रस्तांच्या सेवेसाठी परिचारिका म्हणून रुजू झालेली बॉलिवूड अभिनेत्री शिखा मल्होत्रा (Shikha Malhotra) हिला कोरोनाची लागण झाली आहे. इन्स्टाग्राम अकाऊंटवरुन शिखाने आपल्या तब्येतीविषयी माहिती दिली. गेल्या सहा महिन्यांपासून रुग्णसेवा करत असलेली शिखा जोगेश्वरीमधील हिंदूहृदयसम्राट बाळासाहेब ठाकरे ट्रॉमा हॉस्पिटलमध्ये दाखल आहे. (Bollywood Actress Shikha Malhotra who serves Corona Patients tested COVID Positive)

‘कोव्हिड पॉझिटिव्ह असून रुग्णालयात दाखल झाले आहे. सध्या ऑक्सिजनची कमतरता भासत आहे. कोरोना म्हणजे काहीच नाही, असं म्हणणाऱ्यांसाठी ही पोस्ट आहे. गेल्या सहा महिन्यांपासून सातत्याने रुग्णसेवा करत आहे. तुम्हा सर्वांच्या आशीर्वादामुळे रणमैदानात मी सुखरुप राहिले आणि तुमच्या प्रार्थनांमुळेच मी लवकरच यातून बाहेर पडेन, याची खात्री आहे. आतापर्यंत कोणतीही लस विकसित झालेली नाही, त्यामुळे स्वतःची आणि प्रियजनांची काळजी घ्या. मास्क घाला, नियमितपणे हात धुवा, सॅनिटायझरचा वापर करा. तुमच्या प्रेम आणि आदराबद्दल आभार’ असं लिहून शिखाने दोन फोटो सोशल मीडियावर शेअर केले आहेत.

पहिल्या फोटोत ती रुग्णालयातील बेडवर झोपलेली दिसते, तर पीपीई किट घातला असतानाचा एक फोटोही तिने शेअर केला आहे. हिंदूहृदयसम्राट बाळासाहेब ठाकरे ट्रॉमा हॉस्पिटलच्या आयसोलेशन वॉर्डमध्ये सहा महिन्यांपूर्वी ती रुजू झाली होती.

अभिनेत्री शिखा मल्होत्राने फॅन, रनिंग शादी अशा काही बॉलिवूडपटांमध्ये भूमिका केली आहे. शिखाने संजय मिश्रा यांच्यासोबत ‘कांचली’ या समीक्षकांनी गौरवलेल्या राजस्थानी चित्रपटातही मुख्य भूमिका साकारली आहे.

शिखाने वर्धमान महावीर मेडीकल कॉलेज आणि दिल्लीमधील सफदरजंग हॉस्पिटलमधून 2014 मध्ये नर्सिंगचे शिक्षण घेतले. अभिनय क्षेत्रात वळल्यामुळे तिने नर्सचे काम केले नव्हते. ‘नर्सिंगचे शिक्षण घेतल्यानंतर आम्ही समाजसेवेची शपथ घेतली होती. माझ्या मते हीच ती योग्य वेळ आहे’ असे म्हणत तिने रुग्णसेवेचे व्रत स्वीकारले.

बीएमसीने शिखाला नर्स म्हणून काम करण्यास परवानगी दिली. त्यानुसार मार्च महिन्यापासून ती जोगेश्वरी पूर्वमधील हिंदूहृदयसम्राट बाळासाहेब ठाकरे ट्रॉमा हॉस्पिटलमध्ये ड्युटी करत आहे. तिची नियुक्ती आयसोलेशन वॉर्डमध्ये करण्यात आली आहे.

संबंधित बातम्या :

बॉलिवूड अभिनेत्री ‘कोरोना’ग्रस्तांच्या सेवेत, बाळासाहेब ठाकरे ट्रॉमा हॉस्पिटलमध्ये ड्युटी

(Bollywood Actress Shikha Malhotra who serves Corona Patients tested COVID Positive)