तेलंगणामध्ये बर्थडे केक खाल्ल्याने वडील आणि मुलाचा मृत्यू

हैदराबाद : तेलंगणाच्या (Telangana) सिद्धपेट जिल्ह्यात वाढदिवसाचा केक (Birthday cake) खाल्ल्याने वडील आणि मुलाचा मृत्यू झाला आहे. विशेष म्हणजे हा केक मृत झालेल्या रवी यांच्या भावाने पाठवलेला होता. त्यामुळे त्यांच्या भावावर पोलिसांनी संशय व्यक्त केला आहे. ही घटना जिल्ह्यातील कोमरवेल्ली मंडल अइनापूर गावात बुधवारी (4 ऑगस्ट) घडली. रवी (वय 39), रामचरण (9) असं मृत झालेल्यांची नावं आहेत.

रामचरण याचा बुधवारी वाढदिवस होता. तो साजरा करण्यासाठी रवीच्या छोट्या भावाने केक पाठवला होता. रामचरणच्या वाढदिवसानंतर रवी, रामचरण आणि त्याची आई भाग्यलक्ष्मी, बहीण पूजानेही केक खाल्ला होता. यानंतर चौघेही बेशुद्ध झाले. यावेळी स्थानिकांनी या चौघांना जवळच्या रुग्णालयात दाखल केले. यानंतर उपचारादरम्यान वडील आणि मुलाचा मृत्यू झाला. तर केक खाल्लेल्या आईची तब्येत चिंताजनक आहे. त्यांना जवळच्या रुग्णालयात दाखल केले आहे.

मृत रवीच्या भावाने केक पाठवला होता. त्यासोबतच मुलाचा वाढदिवस मोठ्या जल्लोषात साजरा करावा असा मेसेज देऊन शुभेच्छा दिल्या होत्या. पण या दोन्ही भावांमध्ये वाद होते अशी माहिती समोर आली आहे. त्यामुळे पोलिसांनी रवीच्या भावावर संशय व्यक्त केला आहे.

या घटनेमुळे परिसरात सध्या शोकाकुल वातावरण आहे. केक खाल्ल्याने एकाच कुटुंबातील दोघांना आपले प्राण गमवावे लागले आहेत. सध्या पोलीस या घटनेचा अधिक तपास करत आहेत.