मॅनचेस्टर विमानतळावर पाकिस्तानी क्रिकेटर वासिम अक्रमसोबत गैरवर्तन

लंडन : वेगवान गोलंदाजीने जगभरातील फलंदाजांच्या नाकात दम करणारे पाकिस्तानचे माजी कर्णधार वासिम अक्रम यांच्यासोबत इंग्लंडमधील मँचेस्टर विमान तळावर गैरवर्तन झाले. स्वतः वसीम अक्रम यांनी ट्विट करत याबाबत माहिती दिली.

वासिम यांनी आपल्या ट्विटमध्ये म्हटले आहे, “मंगळवारी मँचेस्टर विमानतळावर माझ्यासोबत झालेल्या वर्तणुकीने मी दुःखी आहे. मी माझे इन्सुलिन घेऊन जगभरातील अनेक देशांमध्ये प्रवास केला. मात्र, मला कधीही अशाप्रकारे अपमानित व्हावे लागले नाही.”

विमानतळ प्रशासनाने आपल्या इन्सुलिन औषधांची व्यवस्थित काळजी घेतली नाही. शुकरचा त्रास असणाऱ्या रुग्णांना नेहमीच आपले इन्सुलिन थंड ठिकाणी ठेवावे लागते. त्यासाठी विशिष्ट केसचा (पिशवी) उपयोग केला जातो. मात्र, विमानतळावर प्रशासनाने इन्सुलिन संबंधित केसमधून प्लास्टिकच्या पिशवीत नेण्यास सांगितले, असंही वासिम यांनी नमूद केलं.

वासिम म्हणाले, “विमानतळावरील अधिकारी माझ्याशी अत्यंत उद्धटपणे बोलले आणि चौकशी केली. तसेच अपमानितही केले. माझ्याकडील इन्सुलिन औषधे सार्वजनिकरित्या थंड पिशवीतून प्लास्टिकच्या पिशवीत ठेवायला सांगितले.”

वासिम अक्रम यांची कारकिर्द

53 वर्षीय वासिम अक्रम डावखुरे वेगवान गोलंदाज आहेत. त्यांनी 1984 मध्ये एकदिवसीय क्रिकेटमध्ये खेळण्यास सुरुवात केली. त्यांनी आपला पहिला सामना 23 नोव्हेंबर 1984 रोजी न्यूझीलंड विरुद्ध खेळला होता. तर शेवटचा एकदिवसीय सामना 2003 मध्ये झिम्बॉब्वेविरुद्ध खेळला.

अक्रमने 356 एकदिवसीय सामन्यात 23.53 च्या सरासरीने 502 विकेट घेतल्या. तसेच 104 कसोटी सामन्यात 23.62 च्या सरासरीने 414 विकेट घेतल्या.