CAA Protest : बुलेटप्रूफ जॅकेट भेदत गोळी आरपार, खिशातील पाकिटामुळे पोलिसाला जीवनदान

लखनऊ : उत्तर प्रदेशच्या फिरोजाबादमध्ये नागरिकत्व सुधारणा कायद्याविरोधात (CAA Protest) निदर्शनादरम्यान कर्तव्यावर असलेल्या एका पोलिसाला छातीत गोळी लागली. यावेळी पोलीस अधिकाऱ्याने बुलेटप्रूफ जॅकेट घातलं होतं. मात्र, ही गोळी त्या बुलेटप्रूफ जॅकेटला भेदत सरळ आत शिरली. मात्र, पोलीस अधिकाऱ्याच्या खिशात असलेल्या पाकिटाने त्याचा जीव वाचवला (Police Constable survived Bullet).

सध्या संपूर्ण देशात नागरिकत्व सुधारणा कायद्याविरोधात निदर्शनं केली जात आहेत. अनेक ठिकाणी जाळपोळ, दगडफेकही झाली. फिरोजाबादमध्येही अशी परिस्थिती पाहायला मिळाली. इथेही CAA विरोधात जोरदार प्रदर्शनं करण्यात आलं. यावेळी फिरोजाबादमधील पोलीस शिपाई बिजेंद्र कुमार CAA विरोधात होत असलेल्या आंदोलनाच्या ड्युटीवर होते. त्यांनी बुलेट प्रूफ जॅकेटही घातलं होतं आणि त्यांनी त्यांचं पाकिट शर्टाच्या वरच्या खिशात ठेवलं होतं. प्रदर्शनादरम्यान, पोलीस शिपाई बिजेंद्र कुमार यांना छातीत गोळी लागली. या गोळीचा वेग इतका होता की ती बुलेट प्रूफ जॅकेट भेदून आत शिरली. गोळीमुळे शर्टही फाटला. मात्र, सुदैवाने ती गोळी बिजेंद्र कुमार यांच्या पाकिटात जाऊन फसली आणि त्यांचा जीव वाचला.

माझ्यासाठी हा दुसरा जन्मच आहे : बिजेंद्र कुमार

मी अत्यंत भाग्यवान आहे की गोळी माझ्या पाकिटात फसली, हा माझा पुनर्जन्मच आहे, अशी भावना पोलीस शिपाई बिजेंद्र कुमार यांनी व्यक्त केली.

या आंदोलना दरम्यान अनेक पोलीस कर्मचाऱ्यांना गोळ्या लागल्या. त्यांच्यावर उपचार सुरु आहेत, सध्या स्थिती नियंत्रणात आहे, अशी माहिती जिल्ह्यातील वरिष्ठ अधिकाऱ्यांनी दिली.

पाकिटात चार एटीएम कार्ड

पोलीस शिपाई बिजेंद्र कुमार यांच्या पाकिटात चार एटीएम कार्ड आणि काही देवी-देवतांचे फोटो होते. ही गोळी आंदोलकांकडून चालवण्यात आल्याचं पोलीस शिपाई बिजेंद्र कुमार यांनी सांगितलं. मात्र, ती कुठल्या दिशेने आली याबाबत त्यांना काहीही कल्पना नसल्याचं त्यांनी सांगितलं.

Wallet Saved Police Constable