मुंबईत डॉक्टरने उचललं टोकाचं पाऊल, तानाजी सावंतांच्या OSD चा होता दबाव? स्टेशनवरच…

फलटण उपजिल्हा रुग्णालयातील डॉक्टर राजेंद्र रूपनवर यांचा मुंबईत मृत्यू झाला आहे. त्यांनी सायन रेल्वे स्थानक परिसरात आत्महत्येचा प्रयत्न केला होता. त्यानंतर त्यांना उपचारासाठी सायन रुग्णालयात दाखल करण्यात आले होते. मात्र, उपचारादरम्यान त्यांचा मृत्यू झाला आहे. या मृत्यूचे थेट कनेक्शन शिवसेना नेते आणि माजी तानाजी सावंत यांच्या पीएशी जोडले जात आहे. हे संपूर्ण प्रकरण काय आहे याबाबत सविस्तर माहिती जाणून घेऊयात.

तानाजी सावंत यांच्या पीएने दिली धमकी?

समोर आलेल्या माहितीनुसार, डॉ. राजेंद्र रूपनवर यांनी काही दिवसांपूर्वी आपल्याला माजी मंत्री तानाजी सावंत यांचा पीए असल्याचा दावा करणाऱ्या प्रसाद कोंडे देशमुख यांच्याकडून जीवे मारण्याची धमकी देण्यात आल्याचा आरोप केला होता. तसेच फलटण उपजिल्हा रुग्णालयाच्या अधीक्षक डॉ. लीला मदने यांच्याकडूनही आपल्याला त्रास दिला जात असल्याचा आरोप त्यांनी केला होता. त्यानंतर त्यांनी सायन रेल्वे स्थानक परिसरात आत्महत्येचा प्रयत्न केला होता. त्यांच्यावर उपचार सुरू असताना आज त्यांचा मृत्यू झाला आहे.

डॉ. रूपनवर यांनी आत्महत्येपूर्वी आपल्या हातावर सुसाईड नोट लिहिल्याची माहिती समोर आली आहे. तसेच त्यांनी सोशल मीडिया प्लॅटफॉर्म इन्स्टाग्रामवर 29 ऑगस्ट रोजी आत्महत्येबाबत इशारा दिला होता अशी माहितीही समोर आली आहे.

डॉ. रूपनवर यांचा व्हिडिओ समोर

डॉ. रूपनवर यांचा एक व्हिडिओ आता समोर आला आहे. त्यात त्यांनी माझा न्यायव्यवस्थेवर विश्वास राहिलेला नाही. कारण डॉक्टर मदने मॅडम यांच्यावर अजूनही कारवाई झालेली नाही. जो चौकशी समितीचा अहवाल आहे तो माझ्यापासून लपवला जात आहे. अहवाल वर पाठवला असं सांगितला जात आहे, मात्र मला तो दाखवला जात नाही. या सर्व प्रकरणामागे डॉक्टर भगवान पवार हे आहेत. त्याचे पितळ उघडे पडेल म्हणून त्यांना वाचवले जात आहे. त्यांचे आरोपी प्रसाद कोंडेसोबत मैत्रीपूर्ण संबंध आहेत हे समोर येईल म्हणून त्यांना वाचवले जात आहे. जर मला न्याय मिळाला नाही तर आधी सांगितल्याप्रमाणे 29 ऑगस्ट 2026 रोजी मी आत्महत्या करेल.