कल्याणमध्ये मद्यधुंद टँकर चालकाचा धुमाकूळ, 2 रिक्षांसह 7-8 दुचाकींना धडक, 5 जण जखमी
Kalyan Tanker Accident : दारूच्या नशेत भरधाव वेगाने पाण्याचा टँकर चालवत कल्याणमध्ये एका चालकाने दोन रिक्षा आणि तब्बल 7 ते 8 दुचाकींना धडक दिली. या अपघातात पाच जण जखमी झाले आहेत.
कल्याणच्या रामबाग स्टेशन रोड परिसरात मद्यधुंद टँकर चालकाने अक्षरशः धुमाकूळ घातल्याची धक्कादायक घटना समोर आली आहे. दारूच्या नशेत भरधाव वेगाने पाण्याचा टँकर चालवत या चालकाने दोन रिक्षा आणि तब्बल 7 ते 8 दुचाकींना धडक दिली. या अपघातात पाच जण जखमी झाले आहेत. सुदैवाने रस्त्यावरून जाणारे अनेक पादचारी आणि नागरिक थोडक्यात बचावले. अन्यथा मोठी जीवितहानी होण्याची शक्यता होती.
मद्यधुंद चालकाचा कहर
मिळालेल्या माहितीनुसार, सोनी कुमार गुल्लू असे या मद्यधुंद टँकर चालकाचे नाव आहे. हा टँकर साईबाबा वॉटर सप्लायर कंपनीचा असल्याची माहिती आहे. चालकाने रामबाग क्रमांक 3, आंबेडकर रोड, ताल हॉटेल ते पुष्पराज हॉटेल या मार्गावर चालकाने बेफाम पद्धतीने टँकर चालवला. यादरम्यान टँकरने दोन रिक्षांसह 7 ते 8 दुचाकींना धडक दिली. या अपघातात पाच जण जखमी झाले. टँकरच्या धुमाकुळामुळे परिसरातील नागरिकांमध्ये काही काळ भीतीचे वातावरण निर्माण झाले होते.
घटना सीसीटीव्ही कॅमेऱ्यात कैद
भरधाव टँकरचा हा थरारक प्रकार परिसरातील सीसीटीव्ही कॅमेऱ्यात कैद झाला आहे. विशेष म्हणजे, नागरिक आणि रिक्षाचालकांनी टँकर चालकाला थांबवण्याचा वारंवार प्रयत्न केला. मात्र, चालकाने टँकरचा वेग कमी करण्याऐवजी आणखी वाढवला. अखेर भरधाव टँकर डिव्हायडरला धडकल्यानंतर नागरिकांनी चालकाला पकडले. संतप्त नागरिकांनी मद्यधुंद चालकाला चोप देत त्याला महात्मा फुले पोलिसांच्या ताब्यात दिले.
चालकाविरोधात गुन्हा दाखल करण्याची प्रक्रिया सुरू
दरम्यान, या घटनेत जखमी झालेले नागरिक आणि रिक्षाचालक महात्मा फुले पोलीस ठाण्यात तक्रार देण्यासाठी दाखल झाले आहेत. त्यांच्या तक्रारीवरून मद्यधुंद टँकर चालकाविरोधात गुन्हा दाखल करण्याची प्रक्रिया सुरू आहे. पोलिसांकडून या संपूर्ण घटनेचा तपास केला जात असून, सीसीटीव्ही फुटेजच्या आधारेही पुढील कारवाई केली जात आहे. गुन्हा दाखल करून या चालकावर कठोर कारवाई करण्याची मागणी परिसरातील नागरिकांनी केली आहे. त्यामुळे आता पोलिस या चालकावर काय कारवाई करतात हे पाहणे महत्त्वाचे ठरणार आहे.
