Mumbai Rains: मुंबईवर अद्यापही मुसळधार पावसाचं सावट, आकाशात काळ्या ढगांची गर्दी
मुंबईत येत्या काही तासांत ताशी 120 किलोमीटर वेगाने वारे वाहण्याची शक्यता वर्तवण्यात आली आहे. | Mumbai weather rain
मुंबई: तौक्ते चक्रीवादळ निघून गेल्यानंतरही मुंबईत मंगळवारी पावसाची शक्यता आहे. पहाटेपासूनच मुंबई आणि उपनगरांसह आजुबाजूच्या परिसरातील आकाशात काळे ढग दाटून आले आहेत. अधूनमधून पावसाच्या (Mumbai Rains) तुरळक सरीही बरसत आहेत. याशिवाय, वारेही (Wind) नेहमीपेक्षा वेगाने वाहत आहेत. वातावरणाचा एकूणच नूर पाहता मुंबईत (Mumbai) पुन्हा एकदा मुसळधार पावसाची शक्यता आहे. (Weather updates Mumbai and suburban region)
तौक्ते चक्रीवादळामुळे सोमवारी दिवसभर मुंबई, उपनगर आणि ठाण्याच्या परिसरात मुसळधार पाऊस कोसळला होता. प्रचंड वेगाने वाहणाऱ्या वाऱ्यांमुळे अनेक ठिकाणी झाडे कोसळण्याच्या घटना घडल्या होत्या. आजही अशाचप्रकारेच वातावरण राहण्याची शक्यता आहे. त्यामुळे मुंबईकरांनी गरजेशिवाय घराबाहेर पडू नये, असे आवाहन प्रशासनाकडून करण्यात आले आहे.
दादरमध्ये पाणी साचलं
दादर टीटी परिसरात आज पहाटेपासून बरसत असलेल्या पावसामुळे पाणी साचले आहे. त्यामुळे याठिकाणी वाहतूक अत्यंत धीम्या गतीने सुरु आहे. आजही दक्षिण मुंबई मुसळधार पाऊस झाल्यास हा परिसर पूर्णपणे जलमय होण्याची शक्यता आहे.
#WATCH | Maharashtra: Trees uprooted in Mumbai’s Ballard Estate area due to heavy rain and wind.#CycloneTaukte pic.twitter.com/YuQuAcCApd
— ANI (@ANI) May 18, 2021
वसई-विरार आणि नालासोपऱ्यात जोरदार पाऊस
वसई, विरार आणि नालासोपारा परिसरात सलग दुसऱ्या दिवशीही वाऱ्यासह जोरदार पाऊस सुरु आहे. काल दिवसभरात चक्रीवादळामुळे अनेक ठिकाणी झाडे आणि विजेचे खांब कोसळण्याच्या घटना घडल्या. परिणामी अनेक भागांमधील वीजपुरवठा खंडित झालेला आहे.
सलग पडणाऱ्या पावसाने शहरातील अनेक सखल भागांत दोन फूट पाणी साचून जनजीवन विस्कळीत झाले आहे. नालासोपारा निलेमोरे गाव, वसई समता नगर, नवजीवन, सतीवली, विरार विवा कॉलेज रोड यासह अन्य भागात काही प्रमाणात पाणी साचले आहे.
मुंबईत पुढील 24 तासांत अतिवृष्टीची शक्यता, हवामान विभागाचा इशारा
मुंबईत मंगळवारी दिवसभरात मुसळधार पाऊस पडण्याची शक्यता हवामान विभागाकडून वर्तविण्यात आली आहे. तसेच मुंबईत येत्या काही तासांत ताशी 120 किलोमीटर वेगाने वारे वाहण्याची शक्यता वर्तवण्यात आली आहे. तसेच महाराष्ट्रातील काही भागात मुसळधार पाऊस होणार असल्याने सतर्कतेचे आदेशही देण्यात आले आहेत. त्यामुळे मुंबईवरील धोका अद्याप पूर्णपणे टळलेला नाही.
संबंधित बातम्या:
मुंबईतल्या अरबी समुद्राचं असं रुप जे तुम्ही कधीच पाहिलं नसेल, सर्वाधिक पाहिला जाणारा Video
Mumbai rains and weather update : मुंबईत 24 तासात अतिवृष्टीची शक्यता, 120 किमी वेगाने वारं वाहणार
(Weather updates Mumbai and suburban region)