नांदेड : किराणा सामान आणण्यासाठी बाहेर पडलेल्या 19 वर्षीय युवकाचा आमदुरा शिवारात चार दिवसांनी मृतदेह (Deadbody) आढळल्याची धक्कादायक घटना नांदेडमध्ये उघडकीस आली आहे. चंद्रकांत उर्फ चांदू पवार असे हत्या (Murder) झालेल्या युवकाचे नाव आहे. याप्रकरणी मुदखेड पोलिसांनी अज्ञात मारेकऱ्याविरोधात हत्येचा गुन्हा दाखल करण्यात आला आहे. घटनेची माहिती मिळताच मुदखेड पोलिस तात्काळ घटनास्थळी दाखल झाले. पोलिसांनी घटनास्थळाचा पंचनामा करत मृतदेह उत्तरीय तपासणीसाठी रुग्णालयात पाठवला. उत्तरीय तपासणीनंतर मृतदेह नातेवाईकांच्या ताब्यात देण्यात आला. (The body of a youth who went missing in Nanded was found in a farm four days later)
मयत चंद्रकांत पवार हा 29 एप्रिल रोजी किराणा सामान आणण्यासाठी घरातून निघून गेला होता. मात्र बराच वेळ उलटून गेला तरी तो घरी परतलाच नाही. त्यामुळे त्याच्या कुटुंबीयांनी दुकानात, आसपासच्या परिसरात त्याची शोधाशोध सुरु केली. पण त्याचा कुठेही थांगपत्ता लागत नव्हता. त्यानंतर चार दिवसांनी थेट त्याचा मृतदेहच आढळून आला. 2 मे रोजी शेतातील गवतामध्ये गळा चिरलेल्या अवस्थेत त्याचा मृतदेह आढळून आला. घटनेची माहिती मुदखेड पोलिसांना देण्यात आली. त्यानंतर पोलिसांनी घटनास्थळी भेट देऊन मृतदेहाचा पंचनामा करून उत्तरीय तपासणीनंतर चंद्रकांत पवार यांचा मृतदेह नातेवाईकांच्या स्वाधीन केला. या प्रकरणी वडील शंकर पवार यांनी दिलेल्या फिर्यादीवरून अज्ञात मारेकऱ्यांविरुद्ध खुनाचा गुन्हा दाखल करण्यात आला आहे. तरुणाची हत्या कुणी आणि कोणत्या कारणासाठी केली याचा पोलीस निरीक्षक महेश शर्मा अधिक तपास करत आहेत. (The body of a youth who went missing in Nanded was found in a farm four days later)