दिल्लीतील भाजपच्या महापालिकेतील सत्तेला सुरुंग लागणार?, आपचं तगडं आव्हान; मतदान सुरू
दिल्ली महापालिकेसाठी आज सकाळी 8 वाजल्यापासून मतदानाला सुरुवात झाली. एकूण 1 कोटी 47 लाख मतदार मतदानाचा हक्क बजावणार आहेत.
नवी दिल्ली: दिल्ली महानगरपालिकेसाठी आज मतदान पार पडत आहे. गेल्या 15 वर्षापासून दिल्ली महापालिकेत सत्ता असलेल्या भाजपसमोर आपचं मोठं आव्हान पाहायला मिळत आहे. भाजपने महापालिका निवडणुकीत देशातील सर्व राष्ट्रीय नेत्यांना रस्त्यावर उतरवून ही निवडणूक प्रतिष्ठेची केली आहे. या पार्श्वभूमीवर आज महापालिका निवडणुकीच्या मतदानातून जनता कुणाला कौल देणार हे पाहणं महत्त्वाचं ठरणार आहे. या निवडणुकीत भाजप-आप व काँग्रेस, राष्ट्रवादी कॉंग्रेस या मुख्य राजकीय पक्षांसह इतर पक्षांचे एकूण 1 हजार 416 उमेदवार मैदानात उतरले आहेत. त्यामुळे या निवडणुकीकडे संपूर्ण देशाचं लक्ष लागलं आहे.
दिल्ली महापालिकेसाठी आज सकाळी 8 वाजल्यापासून मतदानाला सुरुवात झाली. एकूण 1 कोटी 47 लाख मतदार मतदानाचा हक्क बजावणार आहेत. राजधानी दिल्लीत एकूण 13 हजार 638 मतदान केंद्र आहेत. त्यापैकी 3356 मतदान केंद्रे संवेदनशील आहेत.
मतदानाच्या पार्श्वभूमीवर मेट्रोची सेवा आज पहाटे 4 वाजल्यापासून सुरू करण्यात आली आहे. साधारणत: मेट्रोची सेवा सकाळी साडेपाच वाजल्यापासून सुरू होते. मतदानासाठी ही व्यवस्था अगोदरच सुरू केल्याचे डीएमआरसीने म्हटले आहे.
प्रचारातील महत्त्वाचे मुद्दे
आपने कचरा समस्येचा मुद्या उचलून धरत भाजपवर निशाणा साधलाय.
भाजपने आपच्या कथित भ्रष्टाचारावर टीका केली आहे.
दृष्टीक्षेपात निवडणूक
एकूण मतदार- 1 कोटी 47 लाख
पुरुष- 81 लाख 5 हजार
महिला- 66 लाख 80 हजार
एकूण उमेदवार- 1416
पुरुष- 674
महिला- 742
एकूण मतदान केंद्रे- 13,638
संवेदनशील मतदान केंद्रे- 3356
पिंक मतदान केंद्रे- 68
पोलीस बंदोबस्त- 40 हजार पोलीस, 20 हजार होमगार्ड