तुम्हीही झोपेच्या प्रतीक्षेत जागता ? या कारणांमुळे रात्री लवकर झोप येत नाही
झोपेचे विकार आणि निद्रानाश ही अलीकडच्या काळात जगात वेगाने वाढणारी समस्या आहे. आपल्याला चांगले आरोग्य हवे असेल तर रात्री 7 ते 8 तासांची झोप आवश्यक असते. पण बऱ्याच जणांना रात्री लवकर झोप येत नाही. झोप येण्याची प्रतीक्षा करत बरेच लोक एका कुशीवरून दुसऱ्या कुशीवर वळत तळमळत राहतात. रात्री झोप न येण्याची अनेक कारणे असू शकतात.
रात्री व्यायाम करण्याची सवय - अनेक लोकांना रात्री व्यायाम करण्याची सवय असते, त्यामुळेही नीट झोप न लागण्याची समस्या निर्माण होते. खरंतर रात्री व्यायाम केल्याने हृदयाची गती वाढते आणि मज्जासंस्थेला (नर्वस सिस्टीम) चालना मिळते. त्यामुळे शरीराला नीट विश्रांती घेता येत नाही.
फोनचा अधिक वापर - आजकाल लोकांचा मोबाईलचा वापर खूप वाढला आहे. कामाचे फोन, मेल करणे, गेम खेळणे इथपासून ते ऑनलाइन शॉपिंग करण्यापर्यंत सर्व कामं फोनवर होतात, त्यामुळे दिवसातला बराचसा वेळ मोबाईलवरच जातो. काही लोकांना तर त्याची इतकी सवय असते की ते रात्रंदिवस मोबाईलवर असतात. यामुळेही आपल्या झोपेवर परिणाम होतो. खरंतर या गॅजेट्समधून निघणाऱ्या ब्लू लाइटमुळे झोप वाढवणाऱ्या मेलाटॉनिन या हार्मोनच्या पातळीचे नुकसान होते आणि यामुळेच बऱ्याच जणांना रात्री लवकर झोप येत नाही.
वाढतं वय - वाढत्या वयानुसार लोकांना झोपेशी संबंधित समस्या उद्भवू लागतात. वाढत्या वयानुसार अल्झायमरसारखे आजार वाढू लागतात. त्याच वेळी, जुनाट आजारांमुळे वेदना होणे आणि अस्वस्थ वाटणे यामुळेही झोपेवर परिणाम होऊ शकतो.
उशीरापर्यंत काम करण्याची सवय - काही लोकांना रात्री उशिरापर्यंत काम करण्याची सवय असते तर काही लोक शिफ्टमध्ये काम करतात. त्यामुळे बॉडी क्लॉक बिघडते आणि झोप येण्यात अडचण निर्माण होते.