जसप्रीत बुमराह मुंबई इंडियन्सचा स्टार आणि डेथ ओव्हर स्पेशालिस्ट गोलंदाज आहे.लसिथ मलिंगाच्या अनुपस्थितीत मुंबईच्या गोलंदाजीची जबाबदारी बुमराह पार पाडत आहे. मुंबईचा अष्टपैलू खेळाडू किरण पोलार्डने बुमराहचे कौतुक केलं आहे.
"बुमराह जागतिक ख्यातीचा गोलंदाज आहे. तो गेल्या काही काळापासून क्रिकेटच्या तीनही फॉरमेटमधील नंबर 1 बोलर आहे", अशा शब्दात पोलार्डने बुमराहचं कौतुक केलं आहे.
"आम्हाला बुमराहवर पूर्णपणे विश्वास आहे. लसिथ मलिंगा टीममध्ये असताना बुमराहने मलिंगाकडून गोलंदाजीचे धडे घेतले. आता मलिंगाच्या अनुपस्थितीत बुमराह मुख्य गोलंदाजाची भूमिका सार्थपणे पार पाडतोय", असंही पोलार्डने म्हटलं.
मलिंगाने कौटुंबिक कारणांमुळे आयपीएलच्या 13 व्या मोसमातून माघार घेतली आहे. तेव्हापासून बुमराहवर गोलंदाजीची जबाबदारी आणखी वाढली आहे. बुमराहने यंदाच्या मोसमात आतापर्यंत 15 विकेट्स घेतल्या आहेत. दरम्यान मुंबई इंडियन्सने यंदाच्या मोसमात 9 पैकी 6 सामन्यात विजय मिळवला आहे.