पंढरपूर तालुक्यातील शिरढोण येथे शॉर्ट सर्किटमुळे लागलेल्या आगीत जवळपास 50 एकर ऊस जळाला.
या आगीमुळे दहा ते बारा शेतकऱ्यांचे लाखो रुपयांचे नुकसान झाले आहे.
गुरुवारी (12 नोव्हेंबर) दुपारी साडेतीन वाजण्याच्या सुमारास शिरढोण येथील जांभुळकर परिसरातील उसाच्या फडाला अचानक आग लागली.
आग का लागली याचं कारण स्पष्ट झालेलं नसलं तरी आग शॉर्टसर्किटमुळे लागल्याचे शेतकऱ्यांचे म्हणणे आहे.
या आगीत समाधान भोसले यांच्या सुमारे 10 एकर आणि इतर 8 ते 10 शेतकऱ्यांचा सुमारे 35 एकर ऊस आगीच्या भक्ष्यस्थानी पडला आहे.
मात्र, नुकताच महापूर येऊन गेला. त्यावेळी सगळा परिसर पाण्याखाली गेला होता. त्यामुळे जमिनीत मोठ्या प्रमाणात असलेली ओल आगीला नियंत्रित करण्यासाठी उपयुक्त ठरली.
रात्री उशिरापर्यंत उसाच्या फडातून आगीच्या ठिणग्या बाहेर येत होत्या. त्यामुळे नेमकं किती क्षेत्र जळाले आहे, याचा अंदाज नाही.
उशिरापर्यंत शेतकरी आपल्या रक्षणासाठी उपाययोजना करीत बांधावर उभा असल्याचे दिसत होते.