भारत अफगाणिस्तानकडून कोणत्या वस्तूंची आयात करतो? युद्धामुळे व्यापारावर परिणाम होणार?
IND AFG Trade : पाकिस्तान आणि अफगाणिस्तान यांच्यात संघर्षाला सुरुवात झाली आहे. यामुळे भारत आणि अफगाणिस्तानच्या व्यापारावर परिणाम होण्याची शक्यता आहे. याबाबत सविस्तर माहिती जाणून घेऊयात.
व्यापाराचे स्वरूप: भारत अफगाणिस्तानकडून प्रामुख्याने सुका मेवा (Dry Fruits), फळे, हिंग, कॉफी, चहा आणि मसाल्यांची आयात करतो. याउलट, भारत अफगाणिस्तानला औषधे, ऑटोमोबाईलचे सुटे भाग, रेडीमेड कपडे आणि प्राण्यांचे खाद्य निर्यात करतो.
आयातीचे प्रमाण: 2024-25 या आर्थिक वर्षात भारताने अफगाणिस्तानकडून एकूण 66 कोटी डॉलरची आयात केली. यामध्ये फळे आणि सुक्या मेव्याचा वाटा सर्वाधिक (सुमारे 39.94 कोटी डॉलर) होता.
व्यापार संतुलन: या द्विपक्षीय व्यापारात अफगाणिस्तानचे पारडे जड राहिले आहे. 2024 मध्ये अफगाणिस्तानला भारतासोबतच्या व्यापारात 331.368 दशलक्ष डॉलरचा सरप्लस (नफा) मिळाला आहे.
व्यापार मार्ग: भारत आणि अफगाणिस्तान दरम्यानचा व्यापार मुख्यत्वे इराणमधील चाबहार बंदर आणि एअर फ्रेट कॉरिडोरद्वारे चालतो. पाकिस्तानमार्गे होणारा जमिनी मार्ग आधीच बंद असल्याने, या तणावामुळे भारताच्या थेट व्यापार मार्गांवर मोठा परिणाम होण्याची शक्यता कमी आहे.
किमतींवर परिणाम: जरी प्रमुख व्यापारी मार्ग सुरक्षित असले, तरी युद्धजन्य परिस्थितीमुळे पुरवठा साखळीत काही प्रमाणात अडथळे येऊ शकतात. यामुळे सुका मेवा आणि हिंग यांसारख्या पदार्थांच्या किमती वाढण्याची किंवा त्यांच्या उपलब्धतेवर दबाव निर्माण होण्याची शक्यता नाकारता येत नाही.
