मनसेच्या जीवावर मोठे झालेल्यांनी आम्हाला शिकवू नये : अमेय खोपकर

मुंबई : महाराष्ट्र नवनिर्माण चित्रपट सेनेचे अध्यक्ष अमेय खोपकर यांनी भाजप नेते आणि विधानपरिषदेचे विरोधी पक्षनेते प्रवीण दरेकर आणि राम कदम यांच्यावर टीका (Ameya khopkar criticized on ram kadam and pravin darekar) केली आहे.

“पा’दरे’ पावटेंच्या इशाऱ्यांना आपण अजिबातच भीक घालत नाही आणि त्यांच्या सल्ल्याची राज ठाकरे आणि आम्हांला काडीचीही गरज नाही”, असं अमेय खोपकर यांनी ट्वीट करत प्रवीण दरेकर आणि राम कदम यांच्यावल निशाणा साधला.

“मनसेच्या जीवावर मोठे होऊन ज्यांनी मनसेला ‘रामराम’ ठोकला आणि बेडूकउड्या मारुन दुसऱ्या पक्षाची लाचारी सुरु केली, त्यांनी मनसेला शिकवण्याचा आगाऊपणा करु नये”, असं ट्वीट अमेय खोपकर (Ameya khopkar criticized on ram kadam and pravin darekar)  यांनी केले.

“विचारधारा वगैरे शब्द प्रवीण दरेकरांच्या तोंडी शोभत नाहीत. सत्तेची ऊब ज्यांना सतत हवीहवीशी वाटते आणि त्यासाठी कसल्याही तडजोडी करण्याची तयारी असते त्या दरेकरांनी विचारधारेवर बोलणं हा आजचा सर्वात मोठा विनोद आहे”, अशी टीकाही खोपकर यांनी केली.

“राम कदम यांना जुने दिवस आता आठवत नसतील कदाचित, पण जेव्हा ते मनसेमध्ये होते तेव्हासुद्धा बाळासाहेबांवर आमची नितांत श्रद्धा होती आणि आजही आहे. मनसे आता शिवसेनेच्या मार्गावर आहे वगैरे बोलून आपली अक्कल पाजळू नका. कोण सत्तेच्या मागावर आहे हे आम्ही पुरेपूर ओळखून आहोत”, असं खोपकर म्हणाले.

नेमकं प्रकरण काय?

काही दिवसांपूर्वी प्रवीण दरेकर आणि राम कदम यांनी मनसे शिवसेनेच्या वाटेवर येत असल्याचे वक्तव्य केले होते. यावरुन मनसेच्या काही नेत्यांनी दरेकर आणि कदम यांच्यावर टीका केली होती.

भाजपमध्ये येण्यापूर्वी दरेकर आणि कदम हे दोन्ही नेते मनसे पक्षाचे आमदार होते. पण कालांतराने या दोन्ही नेत्यांनी मनसेला रामराम ठोकत भाजपमध्ये प्रवेश केला.